सारथी महाराष्ट्राचा न्यूज | शहादा | प्रतिनिधी
शहादा शहरातील रामचंद्र नगर परिसरातील महिला मंडळाच्या निमंत्रणावरून प्रभागाच्या नगरसेविका तथा उपनगराध्यक्षा माधवीताई मकरंद पाटील आणि नगरसेवक ललितभाई छाजेड यांनी परिसराला भेट देऊन नागरिकांशी प्रत्यक्ष संवाद साधला.
या भेटीदरम्यान परिसरातील महिला भगिनींनी गटार स्वच्छता, ओपन स्पेसचे सुशोभीकरण व विकास, स्वच्छता व्यवस्था आणि पाणीपुरवठा यांसह विविध नागरी सुविधांबाबतच्या प्रमुख समस्या मांडल्या. नागरिकांच्या तक्रारींची गांभीर्याने दखल घेत लोकप्रतिनिधींनी संबंधित विभागप्रमुख, पाणीपुरवठा विभागाचे अधिकारी तसेच स्वच्छता ठेकेदारांना तातडीने घटनास्थळीच पाचारण केले. अधिकाऱ्यांशी सविस्तर चर्चा करून सर्व समस्यांवर लवकरात लवकर तोडगा काढण्याच्या कडक सूचना देण्यात आल्या.
लोकप्रतिनिधींनी स्वतः परिसरात येऊन समस्या जाणून घेतल्या आणि संबंधित अधिकाऱ्यांना समक्ष बोलावून त्वरित उपाययोजना सुरू केल्यामुळे उपस्थित महिला मंडळाने समाधान व्यक्त केले. या तत्पर कार्यपद्धतीबद्दल महिला भगिनींच्या वतीने उपनगराध्यक्षा माधवीताई मकरंद पाटील व नगरसेवक ललितभाई छाजेड यांचा विशेष सत्कार करण्यात आला.
यावेळी बोलताना माधवीताई पाटील म्हणाल्या, “प्रभागातील कोणतीही समस्या नागरिकांनी निःसंकोचपणे आमच्या निदर्शनास आणावी. प्रत्येक प्रश्नाच्या समाधानासाठी आम्ही सदैव कटिबद्ध असून नागरिकांच्या विश्वासाला तडा जाऊ देणार नाही.”
कार्यक्रमाच्या शेवटी लोकप्रतिनिधींनी रामचंद्र नगर परिसरातील महिला भगिनींनी दाखविलेल्या विश्वासाबद्दल मनःपूर्वक आभार मानले तसेच जनतेच्या सेवेसाठी आणि विकासासाठी सदैव तत्पर राहण्याची ग्वाही दिली.
