सारथी महाराष्ट्राचा न्यूज | नाशिक | प्रतिनिधी
नाशिक, दि. २१ : नाशिक शहरातील रिक्षा प्रवाशांसाठी महत्त्वाची बातमी समोर आली आहे. प्रादेशिक परिवहन कार्यालय (आरटीओ) रिक्षांच्या भाडेदरात सुधारणा करण्याच्या प्रक्रियेत असून, लवकरच नवीन भाडेदर लागू होण्याची शक्यता आहे.
इंधनाचे वाढते दर, वाहनांच्या देखभाल-दुरुस्तीचा खर्च तसेच इतर वाढलेल्या खर्चाचा विचार करून रिक्षा भाडेवाढीचा प्रस्ताव तयार करण्यात आला आहे. संबंधित प्रस्तावाला अंतिम मंजुरी मिळाल्यानंतर नवीन भाडेदर अधिकृतपणे लागू करण्यात येणार आहेत. त्यानंतर प्रवाशांना सध्याच्या तुलनेत अधिक भाडे मोजावे लागू शकते.
आरटीओकडून नवीन भाडेदरासंदर्भातील अधिकृत अधिसूचना प्रसिद्ध झाल्यानंतरच सुधारित दर लागू होतील. त्यामुळे प्रवाशांनी अधिकृत दरपत्रकानुसारच भाडे द्यावे आणि कोणत्याही अफवांवर विश्वास ठेवू नये, असे आवाहन प्रशासनाच्या वतीने करण्यात आले आहे.
