सारथी महाराष्ट्राचा न्यूज | सातारा (वाई) | प्रतिनिधी
पीपल्स रिपब्लिकन पार्टीच्या वतीने मंगळवार (दि. 21 जुलै) रोजी सातारा जिल्ह्याचे पोलीस अधीक्षक निखिल पिंगळे यांची भेट घेऊन राजश्री कला क्रीडा मंडळ, हातकणंगले (जि. कोल्हापूर) या संस्थेच्या नावाखाली सातारा जिल्ह्यात कथितरित्या जुगाराचे क्लब चालवले जात असल्याचा आरोप करत संबंधितांवर गुन्हे दाखल करण्याची मागणी करण्यात आली.
निवेदनात म्हटले आहे की, सातारा जिल्ह्यातील अनेक ठिकाणी भोसले नावाचे व्यक्ती स्वतःला राजश्री कला क्रीडा मंडळाचे सचिव म्हणून सांगत पत्त्यांच्या क्लबना संस्थेच्या शाखा देत असल्याचा आरोप आहे. सामाजिक संस्थेची नोंदणी समाजसेवेसाठी असते, जुगार व्यवसायासाठी नव्हे. त्यामुळे या प्रकरणाची सखोल चौकशी करून संबंधित सचिव, अध्यक्ष, उपाध्यक्ष व इतर पदाधिकाऱ्यांवर गुन्हे दाखल करण्यात यावेत तसेच सातारा जिल्ह्यातील संस्थेच्या सर्व कथित शाखा तात्काळ रद्द करण्यात याव्यात, अशी मागणी करण्यात आली आहे.
यावेळी पोलीस अधीक्षक निखिल पिंगळे यांनी जिल्ह्यात जुगाराविरोधात सुरू असलेल्या कारवाईबद्दल त्यांचे अभिनंदनही करण्यात आले.
या प्रकरणाची गंभीर दखल घेऊन कारवाई झाली नाही, तर पीपल्स रिपब्लिकन पार्टीचे राष्ट्रीय अध्यक्ष प्रा. जोगेंद्र कवाडे, राष्ट्रीय कार्याध्यक्ष तथा महाराष्ट्र लघु उद्योग महामंडळाचे उपाध्यक्ष (राज्यमंत्री दर्जा) जयदीप कवाडे यांच्या मार्गदर्शनाखाली जिल्हाध्यक्ष युवराज कांबळे, युवक जिल्हाध्यक्ष अनमोल कांबळे यांच्या नेतृत्वाखाली आंदोलन छेडण्यात येईल, असा इशारा सातारा जिल्हा महासचिव प्रणित मोरे यांनी दिला.
निवेदन देताना राष्ट्रीय मजदूर सेनेचे सातारा जिल्हा संघटक विकास जाधव, वाई तालुकाध्यक्ष विजय सातपुते, वाई शहराध्यक्ष रणवीर परदेशी, अमर कांबळे, गणेश जायगुडे तसेच पक्षाचे इतर पदाधिकारी व कार्यकर्ते उपस्थित होते.
