सारथी महाराष्ट्राचा न्यूज | पारनेर | प्रतिनिधी
पारनेर तालुक्यात लोककला, साहित्य आणि दलित-शोषितांच्या हक्कांसाठी आयुष्य समर्पित करणारे लोकशाहीर अण्णाभाऊ साठे यांचे भव्य स्मारक उभारण्यात यावे, यासाठी जागा उपलब्ध करून शासनाकडून निधी मंजूर करावा, अशी मागणी लोकशाहीर अण्णाभाऊ साठे सामाजिक प्रतिष्ठान, पारनेर यांच्या वतीने आमदार काशिनाथ दाते यांच्याकडे निवेदनाद्वारे करण्यात आली.
निवेदनात नमूद करण्यात आले आहे की, लोकशाहीर अण्णाभाऊ साठे यांनी फकीरा, वारणेचा वाघ, चित्रा यांसारख्या कादंबऱ्या तसेच लावणी, पोवाडे आणि शाहिरीच्या माध्यमातून समाजातील वंचित घटकांच्या हक्कांसाठी प्रभावीपणे आवाज उठवला. संयुक्त महाराष्ट्र चळवळीतही त्यांनी महत्त्वपूर्ण योगदान देत सामाजिक समतेचा संदेश जनतेपर्यंत पोहोचवला.
प्रतिष्ठानच्या पदाधिकाऱ्यांनी सांगितले की, अण्णाभाऊ साठे यांच्या विचारांचा वारसा जपण्यासाठी पारनेर तालुक्यात त्यांचे भव्य स्मारक उभारणे आवश्यक आहे. यामुळे नव्या पिढीला प्रेरणा मिळेल तसेच सांस्कृतिक आणि पर्यटन क्षेत्रालाही चालना मिळेल.
आमदार काशिनाथ दाते यांनी निवेदन स्वीकारून स्मारकासाठी आवश्यक जागा उपलब्ध करून देणे व शासनाकडे निधीच्या प्रस्तावासाठी पाठपुरावा करण्याचे आश्वासन दिले.
यावेळी संतोष शेलार, सतीश साळवे, राजेंद्र आल्हाट, विशाल साळवे, रामदास साळवे, आदिनाथ उमाप, रवींद्र साळवे, मारुती उमाप, संजय शेलार, स्वप्निल जाधव, संजय पठारे, सूर्यभान वैराळ, भानुदास साळवे, प्रमोद आरणे, राजू वैराळ, रामदास वायदंडे, मनोहर कानिंगध्वज यांच्यासह लोकशाहीर अण्णाभाऊ साठे सामाजिक प्रतिष्ठानचे पदाधिकारी व कार्यकर्ते उपस्थित होते.
