सारथी महाराष्ट्राचा न्यूज | इंदापूर | प्रतिनिधी
इंदापूर तालुका ग्रामविकास प्रतिष्ठान संचलित विश्वासराव रणसिंग महाविद्यालय, कळंब (ता. इंदापूर) येथे उपमुख्यमंत्री अजितदादा पवार यांची जयंती अभिवादन व स्मरण कार्यक्रमाने साजरी करण्यात आली. संस्था सचिव विरसिंह रणसिंग यांच्या हस्ते प्रतिमेस पुष्पहार अर्पण करून अभिवादन करण्यात आले.
यावेळी संस्था सचिव विरसिंह रणसिंग यांनी अजितदादा पवार यांच्या कार्याचा गौरव करताना त्यांच्या विकासाभिमुख नेतृत्वाचा विशेष उल्लेख केला. त्यांनी सांगितले की, अजितदादा हे विकासाला सर्वोच्च प्राधान्य देणारे, निर्णयक्षम, शिस्तप्रिय आणि कणखर नेतृत्व आहे. सर्वसामान्य नागरिकांच्या अडचणी समजून घेऊन त्यांना न्याय देण्यासाठी ते सातत्याने प्रयत्नशील राहिले आहेत. त्यांच्या कार्यपद्धतीत वेळेचे नियोजन, प्रशासनावरील पकड आणि विकासकामांबाबतची तळमळ स्पष्टपणे दिसून येते.
यावेळी प्राचार्य डॉ. अशोक काळंगे, उपप्राचार्य ज्ञानेश्वर गुळीग, उपप्राचार्य डॉ. प्रशांत शिंदे, प्राध्यापक, कर्मचारी व विद्यार्थी उपस्थित होते. उपस्थितांनी अजितदादा पवार यांच्या कार्याचा गौरव करत त्यांना शुभेच्छा दिल्या.
