मुंबई | प्रतिनिधी :
कोकण मराठी साहित्य परिषद (कोमसाप) आणि स्वर्णिका पुस्तक प्रकाशन यांच्या संयुक्त विद्यमाने भांडुप येथील रामानंद आर्य डी.ए.व्ही. महाविद्यालयात आयोजित राज्यस्तरीय मराठी भाषा साहित्य संमेलन उत्साहपूर्ण वातावरणात पार पडले.
कार्यक्रमाच्या दुपारच्या दुसऱ्या सत्रात गीतकार शब्दश्री विलास देवळेकर यांनी रचलेले “साहित्य संमेलन स्वागत गीत” ज्येष्ठ गायक व संगीतकार एकनाथ धयाळकर यांनी आपल्या सुरेल आवाजात सादर केले. त्यांच्या सादरीकरणाला उपस्थित साहित्यप्रेमींनी टाळ्यांच्या कडकडाटात उत्स्फूर्त दाद दिली.
यावेळी मराठी साहित्य क्षेत्रातील ज्येष्ठ साहित्यिक पद्मश्री मधु मंगेश कर्णिक यांच्या हस्ते एकनाथ धयाळकर यांचा सपत्नीक तीन पुस्तके आणि स्मृतिचिन्ह देऊन सत्कार करण्यात आला.
या सन्मानामुळे धयाळकर यांच्या संगीत क्षेत्रातील योगदानाचा गौरव करण्यात आला असून, कार्यक्रमाला उपस्थित साहित्यिक, कलाकार आणि रसिकांनी त्यांचे अभिनंदन केले.
