पुणे | प्रतिनिधी
खडकवासला धरणाच्या पाणलोट क्षेत्रात सुरू असलेल्या मुसळधार पावसामुळे धरणातील पाणीसाठ्यात झपाट्याने वाढ होत आहे. या पार्श्वभूमीवर गुरुवार, दि. २३ जुलै २०२६ रोजी रात्री ८.०० वाजल्यापासून खडकवासला धरणाच्या सांडव्यावरून मुठा नदीपात्रात ३,८२५ क्युसेक वेगाने पाण्याचा विसर्ग सुरू करण्यात आला आहे.
जलसंपदा विभागाने दिलेल्या माहितीनुसार, पावसाच्या प्रमाणानुसार पुढील काळात या विसर्गात वाढ किंवा घट होण्याची शक्यता असून नागरिकांनी सतर्क राहण्याचे आवाहन करण्यात आले आहे.
प्रशासनाने मुठा नदीकाठच्या नागरिकांना नदीपात्रात उतरू नये, तसेच नदीपात्रात असलेली जनावरे, वाहने किंवा इतर साहित्य तातडीने सुरक्षित ठिकाणी हलवावे, असे आवाहन केले आहे. सखल भागातील नागरिकांना त्वरित सूचना देऊन आवश्यक ती खबरदारी घेण्याच्या सूचना संबंधित यंत्रणांना देण्यात आल्या आहेत.
नागरिकांनी अफवांवर विश्वास न ठेवता प्रशासनाच्या सूचनांचे पालन करावे आणि कोणतीही आपत्कालीन परिस्थिती उद्भवल्यास स्थानिक प्रशासनाशी तात्काळ संपर्क साधावा, असे आवाहनही करण्यात आले आहे.
