उरण | प्रतिनिधी
उरण तालुक्यातील युवा समाजसेवक श्री. विकास कडू यांची साई ट्रस्ट JNPT, उरण या नामांकित शाळेच्या पालक-शिक्षक संघ (PTA) उपाध्यक्षपदी निवड करण्यात आली आहे. ही निवड शाळेतील पालक प्रतिनिधींच्या (PTA) बैठकीत शिस्तबद्ध वातावरणात पार पडली.
सुमारे ३० ते ३५ वर्षांची शैक्षणिक परंपरा असलेल्या साई ट्रस्ट JNPT शाळेची तालुक्यात उत्कृष्ट शाळांमध्ये गणना केली जाते. दरवर्षी पालक प्रतिनिधींमधून PTA उपाध्यक्षांची निवड केली जाते. यंदा सर्वानुमते विकास कडू यांच्यावर ही जबाबदारी सोपविण्यात आली.
विकास कडू हे रायगड जिल्ह्यातील चाईल्ड केअर सामाजिक संस्था, रायगडचे संस्थापक व अध्यक्ष असून सामाजिक क्षेत्रात सक्रिय कार्य करत आहेत. यापूर्वी त्यांनी IES JNPT, RKF JNPT आणि UES उरण या इंग्रजी माध्यमाच्या शाळांमध्येही PTA उपाध्यक्ष म्हणून जबाबदारी यशस्वीपणे सांभाळली आहे. तसेच ते ‘सारथी महाराष्ट्राचा न्यूज’ आणि ‘आवाज महामुंबईचा’ या वृत्तमाध्यमांशी पत्रकार म्हणूनही कार्यरत आहेत.
निवडीनंतर साई ट्रस्ट JNPT शाळेचे मुख्याध्यापक भूषण जाधव यांनी विकास कडू यांचे अभिनंदन करून त्यांच्या पुढील कार्यासाठी शुभेच्छा दिल्या. तसेच शाळेतील सर्व पालक प्रतिनिधींनी त्यांच्यावर विश्वास व्यक्त करत अभिनंदन केले.
विकास कडू यांच्या निवडीचे वृत्त समोर आल्यानंतर सामाजिक, शैक्षणिक, पत्रकारिता आणि विविध क्षेत्रातील मान्यवरांनी दूरध्वनी, सामाजिक माध्यमे तसेच प्रत्यक्ष भेटीद्वारे त्यांच्यावर शुभेच्छांचा वर्षाव केला. त्यांच्या निवडीमुळे शाळेच्या पालकवर्गात आनंदाचे वातावरण निर्माण झाले असून शाळेच्या सर्वांगीण विकासासाठी त्यांच्या अनुभवाचा लाभ होईल, असा विश्वास व्यक्त केला जात आहे.
