मारेगाव | प्रतिनिधी :
मारेगाव तालुक्यातील शिवनाळा धरण परिसरात एका ५२ वर्षीय वृद्धाचा पाय घसरून तलावात पडल्याने बुडून मृत्यू झाल्याची दुर्दैवी घटना घडली. या घटनेमुळे परिसरात हळहळ व्यक्त होत असून गावात शोककळा पसरली आहे.
मृत व्यक्तीचे नाव चिंटू भीमा टेकाम (वय ५२) असे असून ते शिवनाळा धरण परिसरात मृतावस्थेत आढळून आले. घटनेची माहिती मिळताच स्थानिक नागरिकांनी त्यांच्या मुलाला दूरध्वनीद्वारे याबाबत कळविले. त्यावेळी मुलगा कामानिमित्त बाहेरगावी असल्याचे समोर आले.
यानंतर घटनेची माहिती पोलिसांना देण्यात आली. पोलिसांनी घटनास्थळी भेट देऊन पंचनामा केला असून मृतदेह शवविच्छेदनासाठी पाठविण्यात आला आहे. प्राथमिक माहितीनुसार पाय घसरून तलावात पडल्याने बुडून मृत्यू झाल्याचा अंदाज व्यक्त करण्यात येत आहे.
मृताच्या मुलाने पोलिसांकडे दिलेल्या जबाबात कोणावरही संशय नसल्याचे नमूद केले आहे. शवविच्छेदन अहवालानंतर मृत्यूचे नेमके कारण स्पष्ट होणार असून पोलिसांकडून पुढील तपास सुरू आहे.
