वाशी | प्रतिनिधी :
वाशी शहरासह तालुक्यात गुरुवारी दुपारनंतर पावसाने जोरदार हजेरी लावली. सकाळपासून रिमझिम स्वरूपात सुरू असलेल्या पावसाने दुपारनंतर वेग घेतला आणि सायंकाळी सुमारे ५ वाजल्यापासून मुसळधार पाऊस कोसळू लागला.
या मुसळधार पावसामुळे तालुक्यातील नदी-नाले तुडुंब भरून वाहू लागले असून अनेक ठिकाणी पाण्याचा प्रवाह वाढला आहे. सखल भागांमध्ये पाणी साचल्याने नागरिकांनी खबरदारी घेण्याचे आवाहन करण्यात आले आहे.
दरम्यान, गेल्या काही दिवसांपासून पावसाच्या प्रतीक्षेत असलेल्या शेतकऱ्यांना या पावसामुळे मोठा दिलासा मिळाला आहे. खरीप पिकांसाठी हा पाऊस लाभदायक ठरणार असल्याने शेतकरी वर्गामध्ये समाधानाचे वातावरण आहे.
प्रशासनाने नागरिकांना नदी-नाल्यांच्या परिसरात जाणे टाळण्याचे तसेच आवश्यक ती खबरदारी घेण्याचे आवाहन केले आहे.
