पंढरपूर प्रतिनिधी :
पायल फाउंडेशन संचलित एस. पी. पब्लिक स्कूल, नांदोरे येथे राष्ट्रपुरुष लोकमान्य बाळ गंगाधर टिळक यांच्या पुण्यतिथी तसेच लोकशाहीर साहित्यरत्न अण्णाभाऊ साठे यांच्या जयंतीनिमित्त अभिवादन करून विविध शैक्षणिक व सांस्कृतिक कार्यक्रमांचे आयोजन करण्यात आले. या माध्यमातून विद्यार्थ्यांना दोन्ही महान व्यक्तिमत्त्वांच्या कार्याचा आणि विचारांचा प्रेरणादायी परिचय करून देण्यात आला.
या कार्यक्रमाची संपूर्ण जबाबदारी इयत्ता सातवी (A1) वर्गातील विद्यार्थ्यांनी यशस्वीपणे पार पाडली. विद्यार्थ्यांनी प्रभावी सूत्रसंचालन, मनोगत, भाषणे आणि सांस्कृतिक सादरीकरणातून लोकमान्य टिळक यांच्या राष्ट्रभक्तीचा तसेच लोकशाहीर अण्णाभाऊ साठे यांच्या सामाजिक समतेच्या विचारांचा संदेश उपस्थितांपर्यंत पोहोचविला.
कार्यक्रमाचे सूत्रसंचालन धनश्री व्यवहारे हिने केले, तर संस्कार सावंत याने आभार प्रदर्शन केले. कार्यक्रमाच्या समारोपप्रसंगी बनसोडे सर यांनी प्रेरणादायी मनोगत व्यक्त करत विद्यार्थ्यांनी लोकमान्य टिळक यांच्या राष्ट्रप्रेमाचा आणि अण्णाभाऊ साठे यांच्या सामाजिक बांधिलकीचा आदर्श जीवनात अंगीकारावा, असे आवाहन केले.
यावेळी संस्थेचे संस्थापक अध्यक्ष डॉ. संतोष वलगे, सचिव अश्वराज वाघ, प्रकल्प संचालिका वासंती वलगे, मुख्याध्यापिका स्वाती चव्हाण, उपमुख्याध्यापक कुणाल निंबाळकर, विभाग प्रमुख प्रा. साईनाथ कुंभार तसेच फाउंडेशन विभाग प्रमुख विकास तिवारी यांची प्रमुख उपस्थिती होती.
कार्यक्रमाच्या यशस्वी आयोजनाबद्दल उपस्थित मान्यवरांनी विद्यार्थ्यांचे आणि शिक्षकांचे कौतुक केले. अशा उपक्रमांमुळे विद्यार्थ्यांमध्ये राष्ट्रप्रेम, सामाजिक बांधिलकी आणि महान व्यक्तिमत्त्वांविषयी आदरभाव अधिक दृढ होण्यास मदत होत असल्याचे त्यांनी यावेळी नमूद केले.
