नेकनूर | प्रतिनिधी
घरकुल योजनेतील लाभार्थ्यांच्या विविध अडचणींचे तातडीने निराकरण करण्यासाठी “पंचायत समितीतील घरकुल विभागाचे कर्मचारी आपल्या दारी” या उपक्रमांतर्गत मंगळवार, दि. ४ ऑगस्ट २०२६ रोजी नेकनूर ग्रामपंचायत येथे विशेष कॅम्पचे आयोजन करण्यात आले आहे.
या कॅम्पमध्ये नेकनूर, सावंतवाडी आणि वैतागवाडी (विजयनगर) परिसरातील घरकुल लाभार्थ्यांना घरकुल योजनेच्या हप्त्यांबाबत येणाऱ्या अडचणींचे मार्गदर्शन व निराकरण करण्यात येणार आहे.
पहिला हप्ता जमा न होणे, हप्ता मंजूर होऊनही बँक खात्यात रक्कम दिसत नसणे किंवा इतर कोणतीही तांत्रिक अथवा प्रशासकीय अडचण असल्यास संबंधित लाभार्थ्यांनी कॅम्पला उपस्थित राहावे, असे आवाहन करण्यात आले आहे.
लाभार्थ्यांनी आधार कार्ड तसेच चालू बँक खात्याच्या पासबुकची झेरॉक्स प्रत सोबत आणणे आवश्यक असल्याचे ग्रामपंचायतीकडून सांगण्यात आले आहे.
या विशेष कॅम्पचे आयोजन उपसरपंच सचिन मधुकर शिंदे यांच्या पुढाकाराने करण्यात आले असून, जास्तीत जास्त पात्र लाभार्थ्यांनी या संधीचा लाभ घ्यावा, असे आवाहन आयोजकांनी केले आहे.
