छत्रपती संभाजीनगर : मुक्ताई व्यसनमुक्ती व मराठवाडा मानसिक आरोग्य केंद्रात आज १५ ऑगस्ट स्वातंत्र्य दिन मोठ्या उत्साहात आणि आनंदाच्या वातावरणात साजरा करण्यात आला. कार्यक्रमाची सुरुवात संस्थेचे संस्थापक अध्यक्ष सुनील नागरगोजे यांच्या हस्ते ध्वजारोहणाने झाली. यावेळी महापुरुषांच्या प्रतिमांचे पूजन करण्यात आले.
कार्यक्रमास समुपदेशक आम्रपाली गायकवाड, समुपदेशक प्रियदर्शनी पवार, सुकेशने दाभाडे, सुनील टाकळखेडे, अविनाश शिपे, कांचन कुलकर्णी, अमोल पालवे यांच्यासह केंद्रातील कर्मचारी व रुग्णमित्र उपस्थित होते.
विशेष म्हणजे, व्यसनाच्या गुलामीतून बाहेर पडलेले तसेच सध्या उपचार घेत असलेले रुग्णमित्र यांनी स्वातंत्र्य दिनाच्या कार्यक्रमात उत्स्फूर्त सहभाग घेतला. गायन, नृत्य, भाषण तसेच विविध सांस्कृतिक कार्यक्रम सादर करून त्यांनी आपल्या कलागुणांना वाव दिला. विविध स्पर्धांमध्ये उत्कृष्ट कामगिरी करणाऱ्या रुग्णमित्रांना मान्यवरांच्या हस्ते बक्षीस वितरण करण्यात आले.
यावेळी डॉ. गजानन कदम सर यांनी उपस्थितांना मार्गदर्शन करताना व्यसनाच्या गुलामीतून बाहेर पडण्यासाठी प्रयत्न करणाऱ्या रुग्णमित्रांचे कौतुक केले. व्यसनमुक्तीचा प्रवास हा केवळ एका व्यक्तीचा नसून त्यामागे कुटुंब, समाज आणि उपचार करणाऱ्या प्रत्येक व्यक्तीचे योगदान महत्त्वाचे असल्याचे त्यांनी सांगितले.
या कार्यक्रमातून रुग्णमित्रांना व्यसनाच्या गुलामीतून बाहेर पडून आत्मविश्वासाने आणि सन्मानाने जीवन जगण्याची प्रेरणा मिळाली. स्वातंत्र्य दिनाचा खरा अर्थ केवळ देशाला मिळालेले स्वातंत्र्य नसून, प्रत्येक व्यक्तीने कोणत्याही प्रकारच्या गुलामीतून मुक्त होऊन स्वतःचे आयुष्य नव्याने उभे करणे हाही आहे, असा सकारात्मक संदेश या कार्यक्रमातून देण्यात आला.
कार्यक्रम उत्साहपूर्ण वातावरणात संपन्न झाला.
