आजरा (प्रतिनिधी): गोपाळ गडकरी
येथील जनता सहकारी बँक लि., आजरा या बँकेची ६४ वी वार्षिक सर्वसाधारण सभा दुरदुंडेश्वर कार्यालय (वाणी गल्ली, आजरा) येथे उत्साहात व खेळीमेळीच्या वातावरणात पार पडली. या सभेत सभासदांसाठी १०% लाभांश जाहीर करण्यात आला असून कर्मचाऱ्यांच्या पगारवाढीसह सर्व विषयांना एकमुखाने मंजुरी देण्यात आली.
सभेची सुरुवात मान्यवर चेअरमन व संचालकांच्या हस्ते दीपप्रज्वलनाने झाली. यावेळी सभासद व ग्राहकांना ऑनलाइन आर्थिक व्यवहार करताना घ्यावयाची खबरदारी आणि सायबर सुरक्षिततेविषयी मार्गदर्शन करण्यात आले. प्रारंभी संचालक विक्रम देसाई यांनी स्वागत करून दिवंगत मान्यवरांना श्रद्धांजलीचा ठराव मांडला.
बँकेचे चेअरमन श्री. मुकूंददादा देसाई यांनी प्रास्ताविक केले. यावेळी बँकेच्या सभासदांच्या १० वी, १२ वी व विविध स्पर्धा परीक्षांमध्ये विशेष यश संपादन केलेल्या गुणवंत पाल्यांचा संचालक मंडळाच्या वतीने सत्कार करून त्यांना भावी वाटचालीस शुभेच्छा देण्यात आल्या. यानंतर बँकेचे मुख्य कार्यकारी अधिकारी श्री. एम. बी. पाटील यांनी ६४ व्या वार्षिक सर्वसाधारण सभेपुढील अहवाल वाचन केले.
अहवाल वाचनावेळी ज्येष्ठ सभासद श्री. बाबासाहेब देवकर (रा. कोल्हापूर), श्री. तानाजी देसाई (रा. पेरणोली) व श्री. आनंदा पाटील (रा. मुरगूड) यांनी बँकेच्या प्रगतीबद्दल समाधान व्यक्त करत चेअरमन, संचालक मंडळ व सर्व कर्मचाऱ्यांचे अभिनंदन करणारा ठराव मांडला. तसेच कर्मचाऱ्यांची पदोन्नती, पगार स्केल आणि ताळेबंदाबाबत विचारलेल्या प्रश्नांना मुख्य कार्यकारी अधिकारी श्री. एम. बी. पाटील यांनी सविस्तर उत्तरे देऊन शंकांचे निरसन केले. चेअरमन यांनी मांडलेल्या १०% लाभांश मंजुरीच्या प्रस्तावास सर्व सभासदांनी टाळ्यांच्या गजरात एकमताने संमती दिली. सभेचे आभार श्री. संतोष पाटील यांनी मानले.
या सभेस बँकेचे चेअरमन श्री. मुकूंददादा देसाई, व्हाईस चेअरमन श्री. अमित सामंत, संचालक सर्वश्री महादेव टोपले, जयवंत शिंपी, रणजित देसाई, बाबाजी नाईक, जयवंत कोडक, शशिकांत नार्वेकर, शिवाजी पाटील, विक्रमसिंह देसाई, सौ. रेखा देसाई, सौ. नंदा केसरकर, महेश कांबळे, पांडुरंग तोरगले, संतोष पाटील, तज्ज्ञ संचालक ॲड. एस. एस. निकम, मुख्य कार्यकारी अधिकारी श्री. एम. बी. पाटील, असिस्टंट मॅनेजर श्री. पी. ए. सरंबळे, सिनियर ऑफिसर श्री. माणिक सावंत, श्री. सुहास चौगुले यांच्यासह बँकेचे अधिकारी, कर्मचारी व सभासद मोठ्या संख्येने उपस्थित होते.
