शिराळा : इम्रान सिकंदर मुजावर, तालुका प्रतिनिधी
कोकरूड फाटा येथील शेडगेवाडी-मलकापूर मुख्य चौकात गेल्या काही दिवसांपासून मोठ्या प्रमाणात खड्डे पडल्याने वाहनचालक व प्रवाशांना मोठ्या अडचणींचा सामना करावा लागत होता. खड्ड्यांमुळे छोटे-मोठे अपघात होण्याची शक्यता निर्माण झाली होती. नागरिकांकडून वारंवार तक्रारी करूनही संबंधित कंत्राटदाराकडून याकडे दुर्लक्ष होत असल्याची नाराजी व्यक्त करण्यात येत होती.
दरम्यान, नागरिकांची ही गंभीर समस्या लक्षात घेऊन सामाजिक कार्यकर्ते अनिल घोडे पाटील (अण्णा) यांनी घटनास्थळी जाऊन परिस्थितीची पाहणी केली. त्यांनी चौकातील खड्डे आणि संबंधित कामातील हलगर्जीपणाबाबतचा व्हिडिओ तयार करून सोशल मीडियाच्या माध्यमातून प्रशासनाच्या निदर्शनास ही बाब आणून दिली.
या पाठपुराव्यानंतर काही तासांतच संबंधित कंत्राटदाराने चौकातील खड्डे बुजवण्याचे काम सुरू करून ते पूर्ण केले. त्यामुळे वाहनचालक व प्रवाशांना दिलासा मिळाला असून संभाव्य अपघाताचा धोका कमी झाला आहे.
नागरिकांच्या मूलभूत प्रश्नांकडे लक्ष वेधून तातडीने पाठपुरावा केल्याबद्दल अनिल घोडे पाटील यांचे कोकरूड फाटा परिसरातील नागरिक व प्रवाशांकडून आभार मानण्यात आले.
— इम्रान सिकंदर मुजावर
न्यूज सारथी महाराष्ट्राचा
शिराळा तालुका प्रतिनिधी
