निवळी : प्रतिनिधी
सह्याद्री शिक्षण संस्था, सावर्डे संचलित शिवाजीराव उर्फ बाबासाहेब सुर्वे माध्यमिक विद्यालय, निवळी येथे विद्यार्थ्यांना दुर्मिळ रानभाज्यांची ओळख व्हावी, त्यांचे औषधी महत्त्व समजावे तसेच रानभाज्यांपासून विविध पदार्थ तयार करण्याच्या पद्धतींची माहिती मिळावी, या उद्देशाने सृष्टीज्ञान संस्था, मुंबई यांच्या सहकार्याने रानभाजी महोत्सवाचे आयोजन करण्यात आले. महोत्सवाला विद्यार्थ्यांचा उत्स्फूर्त प्रतिसाद मिळाला.
कार्यक्रमाच्या सुरुवातीला सई शेखरजी निकम, शालेय समिती सदस्य मनोहरजी महाडिक, सृष्टीज्ञान संस्थेचे मार्गदर्शक व मियावाकी प्रकल्प मार्गदर्शक प्रशांतजी शिंदे, प्रकल्प सहकारी ओंकार परकर तसेच विद्यालयाचे मुख्याध्यापक श्री. दळवी सर यांच्या प्रमुख उपस्थितीत दीपप्रज्वलन करून महोत्सवाचे उद्घाटन करण्यात आले. यावेळी विद्यालयाच्या वतीने उपस्थित मान्यवरांचा शाल व श्रीफळ देऊन सत्कार करण्यात आला.
या रानभाजी महोत्सवात विद्यालयातील तसेच इंग्लिश मीडियम विभागातील सुमारे २०० विद्यार्थ्यांनी उत्स्फूर्त सहभाग घेतला. विद्यार्थ्यांनी जवळपास ४० प्रकारच्या रानभाज्यांपासून विविध पदार्थ तयार करून त्यांचे औषधी महत्त्व उपस्थित मान्यवर व विद्यार्थ्यांना समजावून सांगितले.
महोत्सवात लहान व मोठ्या अशा दोन गटांमध्ये एकूण ४० गटांनी सहभाग नोंदवला. लहान गटात प्रथम क्रमांक पिंपळ गट, द्वितीय अडुळसा गट आणि तृतीय चंदन व पारिजातक गटाने मिळवला. तर मोठ्या गटात प्रथम वड गट, द्वितीय शेवगा गट आणि तृतीय लाल चंदन व कोकम गटाने मिळवला. विजेत्या गटांना सृष्टीज्ञान संस्थेच्या वतीने पारितोषिक देऊन मान्यवरांच्या हस्ते गौरविण्यात आले.
यावेळी सई शेखरजी निकम यांनी विद्यालयाने राबविलेल्या या अभिनव उपक्रमाचे कौतुक करून सहभागी विद्यार्थ्यांचे अभिनंदन केले. मनोहरजी महाडिक आणि प्रशांत शिंदे यांनीही विद्यार्थ्यांना शुभेच्छा दिल्या.
कार्यक्रमाचे सूत्रसंचालन श्री. सरमळकर सर यांनी केले, तर आभार प्रदर्शन श्री. व्ही. आर. सावंत यांनी केले. महोत्सवाच्या यशस्वी आयोजनासाठी विद्यालयातील सर्व शिक्षक, शिक्षकेतर कर्मचारी आणि विद्यार्थ्यांनी विशेष मेहनत घेतली.
रानभाज्यांच्या माध्यमातून स्थानिक जैवविविधता, पारंपरिक आहारपद्धती आणि पर्यावरण संवर्धनाची माहिती विद्यार्थ्यांना मिळाल्याने हा महोत्सव विद्यार्थ्यांसाठी ज्ञानवर्धक व उपयुक्त ठरला.
