फलटण (प्रतिनिधी) – फलटण नगर परिषद, महिला व बालकल्याण समिती, दीनदयाळ अंत्योदय योजना – राष्ट्रीय नागरी उपजीविका अभियान व आत्मनिर्भर शहर स्तर संघ, फलटण यांच्या संयुक्त विद्यमाने शहरातील बचत गटांच्या उत्पादनांसाठी आठवडी बाजाराचे आयोजन करण्यात आले आहे. या बाजाराचा शुभारंभ आज रविवार दि. २३ ऑगस्ट रोजी सकाळी १०.३० वाजता फलटण नगरपरिषद प्रांगण, आंबेडकर चौक येथे मान्यवरांच्या हस्ते करण्यात आला.
या कार्यक्रमाच्या अध्यक्षस्थानी फलटणचे आमदार मा. श्री. सचिन पाटील व लोकनियुक्त नगराध्यक्ष मा. श्री. समशेर हिंदुराव नाईक निंबाळकर हे होते. तर प्रमुख उपस्थिती म्हणून मुख्याधिकारी मा. श्री. निखिल जाधव हे होते.
या आठवडी बाजारात फलटण शहरातील २० ते २५ बचत गटांनी आपले स्टॉल लावले होते. यामध्ये महिलांनी घरगुती बनवलेले मसाले, पापड, कुरडई, लोणची, चटण्या, बांबूच्या वस्तू, शिवणकाम व इतर हस्तकला वस्तू विक्रीसाठी ठेवण्यात आल्या होत्या.
यावेळी कार्यक्रमात आत्मनिर्भर शहर स्तर संघाच्या अध्यक्षा सौ. मालन गोडसे, सचिव सौ. सपना गायकवाड व व्यवस्थापक सौ. विद्या रिठे यांच्यासह बचत गटाच्या महिलांचा पुष्पगुच्छ देऊन सन्मान करण्यात आला.
“महिलांनी तयार केलेल्या मालाला बाजारपेठ मिळावी व महिला आर्थिकदृष्ट्या सक्षम व्हाव्यात या उद्देशाने हा आठवडी बाजार सुरु केला आहे. दर रविवारी हा बाजार भरवला जाणार आहे, तरी फलटणकर नागरिकांनी याला प्रतिसाद द्यावा” असे आवाहन शहर अभियान व्यवस्थापक श्री. शशिकांत शिरतोडे यांनी केले.
या कार्यक्रमास नगरपरिषदेचे सर्व अधिकारी, कर्मचारी व शहरातील नागरिक मोठ्या संख्येने उपस्थित होते
