कळंबोली | प्रतिनिधी :
पनवेल महानगरपालिका हद्दीतील कळंबोली परिसरात वाढलेल्या झाडांच्या फांद्यांमुळे नागरिक, वाहनचालक आणि व्यापारी वर्गाला होत असलेला त्रास लक्षात घेऊन नगरसेविका सौ. बायजा बबन बारगजे यांच्या पुढाकारातून झाडांची आवश्यक छाटणी करण्यात आली. या कार्यवाहीमुळे रस्ते व पादचारी मार्ग मोकळे होऊन नागरिकांना मोठा दिलासा मिळाला आहे.
कळंबोली येथील केएल-४ परिसरातील विविध ठिकाणी झाडांच्या फांद्या रस्त्यावर तसेच विद्युत वाहिन्यांच्या दिशेने वाढल्या होत्या. त्यामुळे वाहतुकीला अडथळा निर्माण होण्यासोबतच नागरिकांच्या सुरक्षिततेचा प्रश्नही निर्माण झाला होता. नागरिकांनी ही बाब नगरसेविका बायजा बारगजे यांच्या निदर्शनास आणून दिल्यानंतर त्यांनी तत्काळ संबंधित विभागाशी संपर्क साधून झाडांच्या छाटणीची कार्यवाही करून घेतली.
या कामाच्या वेळी भाजपा नेते बबन बारगजे यांनी दिवसभर प्रत्यक्ष घटनास्थळी उपस्थित राहून कामाची पाहणी केली. परिसरातील नागरिक महेंद्र खबाले, वैभव फाळके तसेच व्यापारी वर्गाशी समन्वय साधत छाटणीचे काम सुरळीतपणे पार पाडण्यासाठी त्यांनी सहकार्य केले. महानगरपालिकेचे सुपरवायझर आतिश चौधरी यांच्या समन्वयाने ही कार्यवाही करण्यात आली.
छाटणीसाठी आवश्यक वाहने व साधनसामग्री घटनास्थळी उपलब्ध करून देण्यासोबतच कामात अडथळा निर्माण करणारी वाहने हटविण्यासाठीही बबन बारगजे यांनी पुढाकार घेतला. त्यामुळे महानगरपालिका कर्मचाऱ्यांना काम करणे सुलभ झाले आणि छाटणीचे काम वेळेत पूर्ण करण्यात आले.
या कार्यवाहीमुळे केएल-४ परिसरातील रस्ते व पादचारी मार्ग मोकळे झाले असून विद्युत वाहिन्यांच्या जवळ वाढलेल्या फांद्यांमुळे निर्माण होणारा संभाव्य धोका कमी झाला आहे. त्यामुळे परिसरातील वाहतूक आणि नागरिकांच्या सुरक्षिततेच्या दृष्टीनेही या कामाचा फायदा झाला आहे.
“नागरिकांच्या समस्या केवळ कागदोपत्री न राहता प्रत्यक्ष ठिकाणी उपस्थित राहून सोडविण्याला प्राधान्य आहे. परिसरातील नागरिकांच्या अडचणी सोडविण्यासाठी यापुढेही सातत्याने प्रयत्न केले जातील,” असे भाजपा नेते बबन बारगजे यांनी सांगितले.
या कार्यवाहीबद्दल केएल-४ परिसरातील नागरिक व व्यापारी वर्गाने समाधान व्यक्त करत नगरसेविका बायजा बबन बारगजे आणि भाजपा नेते बबन बारगजे यांचे आभार मानले.
