फलटण | प्रतिनिधी
फलटण नगरपरिषदेच्या प्रांगणात आयोजित करण्यात आलेल्या बचत गटाच्या आठवडी बाजाराला आज नागरिकांसह बाल-गोपाळांचा उत्स्फूर्त प्रतिसाद मिळाला. विविध बचत गटांच्या माध्यमातून तयार करण्यात आलेल्या खाद्यपदार्थ व वस्तूंच्या स्टॉलला नागरिकांनी भेट देत खरेदी केली.
यावेळी फलटण नगराध्यक्ष मा. समशेर दादा नाईक निंबाळकर यांनी बाल-गोपाळांसोबत बचत गटांच्या स्टॉलला भेट देत विविध पदार्थांचा आस्वाद घेतला. त्यांच्या या सहभागामुळे बचत गटातील महिलांना प्रोत्साहन मिळाले.
महिलांच्या स्वावलंबनाला आणि स्थानिक बचत गटांच्या उत्पादनांना बाजारपेठ उपलब्ध करून देण्याच्या उद्देशाने हा आठवडी बाजार दर रविवारी भरविण्यात येणार आहे. या उपक्रमामुळे बचत गटातील महिलांना आपल्या उत्पादनांची विक्री करण्यासाठी नियमित व्यासपीठ उपलब्ध होणार असून, त्यांच्या आर्थिक सक्षमीकरणाला चालना मिळण्याची अपेक्षा आहे.
दर रविवारी आयोजित होणाऱ्या या बाजाराचा नागरिकांनी लाभ घ्यावा आणि बचत गटातील महिलांच्या उत्पादनांना प्रोत्साहन द्यावे, असे आवाहन करण्यात आले आहे.
