गुप्तेश्वर मंदिराला उपमुख्यमंत्री एकनाथ शिंदे भेट देणार.

धारासूर येथील सुरू असलेल्या जतन-संवर्धन व जीर्णोद्धार कामाची पाहणी करणार
गंगाखेड : तालुक्यातील मौजे धारासूर येथील प्राचीन व ऐतिहासिक राज्य संरक्षित स्मारक असलेल्या गुप्तेश्वर मंदिराच्या जतन, संवर्धन व जीर्णोद्धाराच्या सुरू असलेल्या कामाची पाहणी करण्यासाठी उपमुख्यमंत्री एकनाथ शिंदे आगामी परभणी दौऱ्यादरम्यान धारासूर येथे भेट देणार आहेत. त्यांच्या संभाव्य भेटीमुळे मंदिराच्या संवर्धनाच्या कामाला अधिक गती मिळण्याची अपेक्षा व्यक्त होत आहे.
उपमुख्यमंत्री एकनाथ शिंदे हे 30 ऑगस्ट २०२६ रोजी परभणी दौऱ्यावर येणार असून, परभणी येथील इंदिरा गांधी स्टेडियमवर त्यांच्या उपस्थितीत कार्यक्रम होणार आहे. या दौऱ्यादरम्यान धारासूर येथील गुप्तेश्वर मंदिराला भेट देऊन सुरू असलेल्या जतन-संवर्धन व जीर्णोद्धाराच्या कामाची पाहणी करण्याची माहिती निवृत्ती कदम यांनी दिली.

गुप्तेश्वर मंदिराच्या जतन व संवर्धनाच्या कामाची पाहणी करून आवश्यक त्या सूचना देण्यात याव्यात, अशी मागणी गुप्तेश्वर बचाव संघर्ष समितीच्या शिष्टमंडळाने उपमुख्यमंत्री एकनाथ शिंदे यांची ठाणे येथील निवासस्थानी भेट घेऊन निवेदनाद्वारे केली होती. या भेटीदरम्यान शिष्टमंडळाने मंदिराचे ऐतिहासिक व सांस्कृतिक महत्त्व त्यांच्या निदर्शनास आणून दिले होते.
गुप्तेश्वर मंदिर हे धारासूरच्या ऐतिहासिक आणि सांस्कृतिक वारशाचे महत्त्वाचे प्रतीक मानले जाते. मंदिराच्या जीर्णोद्धाराचे काम सुरू असल्याने या कामाची गुणवत्ता, प्रगती आणि संवर्धनाच्या दृष्टीने आवश्यक उपाययोजनांची पाहणी उपमुख्यमंत्र्यांच्या भेटीदरम्यान होणार आहे.
उपमुख्यमंत्र्यांच्या संभाव्य भेटीमुळे गुप्तेश्वर मंदिराच्या संवर्धनाच्या कामाला अधिक चालना मिळण्याची अपेक्षा आहे. मंदिराचा ऐतिहासिक वारसा जतन करण्याबरोबरच परिसराच्या विकासासाठीही ही भेट महत्त्वपूर्ण ठरणार असल्याची भावना ग्रामस्थ व मंदिर संवर्धनासाठी कार्यरत असलेल्या पदाधिकाऱ्यांकडून व्यक्त होत आहे.
गुप्तेश्वर मंदिराचा ऐतिहासिक वारसा जतन करून त्याचा सर्वांगीण विकास व्हावा, यासाठी प्रशासनाने सुरू असलेल्या कामाला गती द्यावी, अशी मागणी ग्रामस्थांकडून होत आहे.