तालुका प्रतिनिधी : रामेश्वर स्वामी
बार्शी : तडवळे, ता. बार्शी येथील प्राथमिक आरोग्य केंद्राच्या नवीन इमारतीच्या बांधकामासाठी अंदाजे १ कोटी रुपयांचा निधी मंजूर करावा, अशी मागणी ग्रामस्थांनी विधानपरिषदेचे आमदार राजेंद्र (राजाभाऊ) राऊत यांच्याकडे निवेदनाद्वारे केली आहे.
तडवळे येथे दहिटणे, ढोराळे, मुंगशी, यावली, सुर्डी, इर्ले, इर्लेवाडी, मालवंडी, तुर्कपिंपरी, गुळपोळी आणि तडवळे अशा ११ गावांसाठी प्राथमिक आरोग्य केंद्र उपलब्ध आहे. तसेच या परिसरात एक प्राथमिक आरोग्य उपकेंद्रही सुरू आहे.
मात्र, गेल्या २५ वर्षांपासून प्राथमिक आरोग्य केंद्राची मुख्य इमारत जीर्ण होऊन पूर्णपणे कोसळलेल्या अवस्थेत आहे. त्यामुळे सध्या प्राथमिक आरोग्य केंद्राचे कामकाज कर्मचाऱ्यांसाठी असलेल्या लहान क्वार्टरमध्ये सुरू आहे. ही इमारतदेखील जीर्ण झालेली असून आरोग्य विभागातील अधिकारी व कर्मचाऱ्यांना काम करण्यासाठी पुरेशी जागा उपलब्ध नाही.
जागेअभावी रुग्णांना आवश्यक उपचार देताना अडचणी निर्माण होत असून, रुग्णांसाठी आवश्यक असलेला औषधसाठा ठेवण्यासाठीही पुरेशी जागा उपलब्ध नाही. परिणामी परिसरातील नागरिकांना प्राथमिक आरोग्य सेवांचा पुरेसा लाभ मिळण्यात अडथळे निर्माण होत आहेत.
दरम्यान, सार्वजनिक बांधकाम विभागाने सदर इमारत जीर्ण व धोकादायक असल्याचा अहवाल दिलेला असतानाही नाईलाजास्तव याच ठिकाणी आरोग्य विभागाचे कामकाज सुरू आहे. त्यामुळे नागरिकांच्या आरोग्याच्या दृष्टीने नवीन इमारतीचा प्रश्न तातडीने मार्गी लावण्याची आवश्यकता असल्याचे ग्रामस्थांनी निवेदनात म्हटले आहे.
या सर्व बाबींचा गांभीर्यपूर्वक विचार करून तडवळे प्राथमिक आरोग्य केंद्र व उपकेंद्रासाठी नवीन इमारत बांधकामाकरिता अंदाजे १ कोटी रुपयांचा निधी मंजूर करावा, अशी मागणी रोहित तुपसमुद्रे, आकाश गव्हाणे, माऊली जाधव, सुहास पवार आणि सागर माने यांनी निवेदनाद्वारे केली आहे.
