शहादा, दि. २३ (का.प्र.) : पंतप्रधान नरेंद्र मोदी यांच्या वाढदिवसानिमित्त भारतीय जनता पक्षाच्या वतीने ‘सेवा संकल्प अभियान’ राबविण्यात येत असून, त्याअंतर्गत वडनगर ते वाराणसी तसेच वाराणसी ते वडनगर अशा सेवा संकल्प बाइक यात्रांचे आयोजन करण्यात आले आहे. १७ सप्टेंबर रोजी सुरू झालेल्या या यात्रेचे शहादा शहरात सोमवारी ढोल-ताशांच्या गजरात आणि उत्साहपूर्ण वातावरणात स्वागत करण्यात आले.
रॅलीच्या स्वागतावेळी फटाक्यांची आतषबाजी, ढोल-ताशांचा गजर आणि घोषणांनी शहरातील वातावरण उत्साहपूर्ण झाले होते. शहादा शहरात रॅलीचे आगमन झाल्यानंतर सर्वप्रथम छत्रपती शिवाजी महाराज यांच्या पुतळ्यास अभिवादन करण्यात आले. त्यानंतर डॉ. बाबासाहेब आंबेडकर यांच्या स्मारकास पुष्पहार अर्पण करून अभिवादन करण्यात आले.
यानंतर रॅली लोणखेडा येथील स्वर्गीय अण्णासाहेब पी. के. पाटील स्मारकस्थळी पोहोचली. येथे आयोजित कार्यक्रमात उपस्थित मान्यवरांनी ‘सेवा संकल्प अभियानाची’ माहिती दिली. भाजपच्या माहितीनुसार, या अभियानाच्या माध्यमातून सेवा, जनसंपर्क आणि विविध सामाजिक उपक्रमांचा संदेश देण्याचे नियोजन करण्यात आले आहे.
यावेळी भाजप जिल्हाध्यक्ष निलेश माळी, ज्येष्ठ नेते दीपकभाई पाटील, जिल्हा उपाध्यक्ष प्रा. मकरंदभाई पाटील, उपनगराध्यक्ष माधवीताई मकरंद पाटील, महाराष्ट्र राज्य परिषद सदस्य विनोद जैन, युवा मोर्चा अध्यक्ष प्रशांत पाटील यांच्यासह पक्षाचे पदाधिकारी व कार्यकर्ते उपस्थित होते.
शहराध्यक्ष ज्ञानेश्वर चौधरी आणि युवा मोर्चा जिल्हाध्यक्ष तुषार पाटील यांच्या नेतृत्वाखाली रॅलीचे स्वागत करण्यात आले. रॅलीच्या स्वागतासाठी कार्यकर्त्यांची मोठी उपस्थिती होती.
