श्रीगोंदा, दि. २३ (प्रतिनिधी) : श्रीगोंदा तालुक्यातील ऐतिहासिक वारसा लाभलेल्या पेडगाव व लगतच्या नदीकाठच्या शिवारात बिबट्याचे दर्शन झाल्याने ग्रामस्थ व शेतकऱ्यांमध्ये भीतीचे वातावरण निर्माण झाले आहे. शेतात काम करताना तसेच रात्रीच्या वेळी बिबट्या दिसून आल्याचे ग्रामस्थांचे म्हणणे असून, त्यामुळे शेतमजूर व स्थानिक नागरिकांमध्ये घबराट पसरली आहे.
पेडगाव परिसर भीमा नदीच्या काठावर असून या भागात मोठ्या प्रमाणावर उसाची शेती आहे. मुबलक पाणी, घनदाट ऊस क्षेत्र तसेच भटकी कुत्री व शेळ्यांसारखे सहज उपलब्ध होणारे खाद्य यामुळे बिबट्याचा वावर या परिसरात वाढल्याचे ग्रामस्थ सांगतात. गेल्या काही दिवसांपासून शिवारात बिबट्याच्या पाऊलखुणा आढळून येत असल्याचेही सांगण्यात येत आहे.
सध्या शेतांमध्ये खुरपणी, पाणी देणे आणि मशागतीची कामे सुरू आहेत. मात्र बिबट्याच्या भीतीमुळे शेतमजूर कामावर येण्यास घाबरत असल्याचे ग्रामस्थांचे म्हणणे आहे. रात्रीच्या वेळी पिकांना पाणी देण्यासाठी जाणाऱ्या शेतकऱ्यांसह पहाटे दूध संकलनासाठी जाणाऱ्या नागरिकांमध्येही भीतीचे वातावरण आहे.
दरम्यान, बिबट्याच्या वावराची माहिती मिळताच ग्रामस्थांनी वन विभागाला सतर्क केले आहे. कोणताही अनुचित प्रकार घडण्यापूर्वी पेडगाव शिवारात तातडीने पिंजरा लावावा तसेच रात्रीच्या वेळी परिसरात गस्त वाढवावी, अशी मागणी ग्रामस्थांनी केली आहे.
ग्रामस्थांनी सावधगिरी बाळगण्याचे आवाहन
बिबट्याचा वावर असल्याने नागरिकांनी रात्रीच्या वेळी शक्यतो एकटे शेतात जाणे टाळावे, सोबत टॉर्च ठेवावी, लहान मुलांना एकटे बाहेर पाठवू नये आणि पाळीव जनावरांना सुरक्षित ठिकाणी बांधावे, असे आवाहन करण्यात आले आहे. बिबट्या दिसल्यास त्याला चिथावणी देऊ नये किंवा दगडफेक करू नये. त्याऐवजी तत्काळ वन विभागाला माहिती द्यावी, असे ग्रामस्थांनी सांगितले.
