करणवाडी गावालगतच्या दुभाजकावर रिफ्लेक्टर व रेडियम खांब बसविण्याची मागणी; प्रशासनाच्या दुर्लक्षावर मनसेचा सवाल
मारेगाव, प्रतिनिधी :
मारेगाव तालुक्यातील करणवाडी गावालगत महामार्गावर असलेल्या दुभाजकावर रिफ्लेक्टर अथवा रेडियम खांबांची आवश्यकता असतानाही प्रशासनाकडून याकडे दुर्लक्ष होत असल्याचे दिसून येत आहे. रात्रीच्या वेळी हा दुभाजक वाहनचालकांना स्पष्टपणे दिसत नसल्याने अपघाताचा धोका निर्माण झाला आहे.
याच दुभाजकामुळे यापूर्वी मारेगाव पोलीस ठाण्याच्या हद्दीत अपघाताच्या घटना घडल्याचे समोर आले आहे. त्यामुळे प्रशासनाने अद्याप या ठिकाणी सुरक्षेच्या उपाययोजना का केल्या नाहीत, असा सवाल वणी येथील मनसेचे प्रमुख राजूभाऊ उंबरकर यांनी उपस्थित केला आहे.
महामार्गावर ठिकठिकाणी खड्डे पडलेले असतानाही टोलवसुली सुरू आहे; मात्र रस्ते सुरक्षा आणि आवश्यक उपाययोजनांकडे दुर्लक्ष होत असल्याची परिस्थिती असल्याचे उंबरकर यांनी म्हटले आहे. करणवाडी गावालगतच्या दुभाजकावर तातडीने रिफ्लेक्टर, रेडियम खांब किंवा इतर दृश्यमान सुरक्षा व्यवस्था करावी, तसेच महामार्गावरील खड्ड्यांची दुरुस्ती करावी, अशी मागणी त्यांनी केली आहे.
वाहनचालकांच्या सुरक्षिततेच्या दृष्टीने प्रशासनाने या गंभीर प्रश्नाकडे तातडीने लक्ष देऊन आवश्यक उपाययोजना कराव्यात, अशी मागणी राजूभाऊ उंबरकर यांनी केली आहे.
