तहसीलदार कार्यालयाशेजारील जुन्या पंचायत समिती गोडाऊनसमोर आढळला मृतदेह; मृत्यूचे कारण अद्याप अस्पष्ट
प्रतिनिधी –
वडूज : वडूज शहरातील तहसीलदार कार्यालयाशेजारी असलेल्या जुन्या पत्र्याच्या पंचायत समिती गोडाऊनसमोर एका तरुणाचा कुजलेल्या अवस्थेतील मृतदेह आढळून आल्याने परिसरात खळबळ उडाली आहे. मृतदेहाजवळ आढळलेल्या आधारकार्ड व पॅनकार्डच्या आधारे मृताची ओळख पटली आहे.
मृत तरुणाचे नाव रंजीत व्यंकाप्पा वडियार (वय २५) असून तो रा. तडकल, ता. आळंद, जि. गुलबर्गा, कर्नाटक येथील रहिवासी असल्याची माहिती समोर आली आहे. रंजीत हा वडूज परिसरात मजुरीचे काम करत होता. सध्या तो कातर-खटाव रोड परिसरात वास्तव्यास असल्याचेही सांगण्यात येत आहे.
दरम्यान, मृतदेह कुजलेल्या अवस्थेत आढळून आल्याने रंजीतच्या मृत्यूबाबत विविध प्रश्न उपस्थित झाले आहेत. त्याचा मृत्यू नेमका कशामुळे झाला, याचे कारण अद्याप स्पष्ट झालेले नाही.
घटनेची माहिती मिळताच वडूज पोलिसांनी घटनास्थळी धाव घेतली. पोलिसांनी मृतदेहाबाबत आवश्यक कायदेशीर प्रक्रिया सुरू केली असून, घटनेचा पुढील तपास वडूज पोलीस ठाण्याचे पोलीस निरीक्षक घनश्याम सोनवणे यांच्या मार्गदर्शनाखाली सुरू आहे. मृत्यूचे नेमके कारण तपासाअंती स्पष्ट होणार आहे.
