संस्था स्तरावर सोलजर्स इंडिपेंडंट रिहॅबिलिटेशन फाउंडेशन, पुणे; व्यक्ती स्तरावर पद्मश्री डॉ. श्रीरंग देवबा लाड यांची निवड
शहादा, दि. २६ सप्टेंबर २०२६ : प्रतिनिधी : येथील श्री. पी. के. अण्णा पाटील फाउंडेशन आणि पूज्य साने गुरुजी विद्या प्रसारक मंडळ यांच्या वतीने देण्यात येणाऱ्या यंदाच्या पुरुषोत्तम पुरस्कारांची घोषणा करण्यात आली आहे. संस्था स्तरावर पुणे येथील सोलजर्स इंडिपेंडंट रिहॅबिलिटेशन फाउंडेशन, तर व्यक्ती स्तरावर माळसोन्ना (जि. परभणी) येथील कापूसतज्ज्ञ पद्मश्री डॉ. श्रीरंग देवबा लाड (दादा लाड) यांची निवड करण्यात आली आहे. फाउंडेशनचे अध्यक्ष दीपकभाई पाटील आणि सचिव प्रा. मकरंद पाटील यांनी ही माहिती दिली.
सहकार महर्षी अण्णासाहेब पी. के. पाटील यांच्या जयंतीनिमित्त दरवर्षी सामाजिक, शैक्षणिक आणि संशोधन क्षेत्रात उल्लेखनीय कार्य करणाऱ्या व्यक्ती व संस्थांना हा पुरस्कार प्रदान केला जातो. पुरस्काराचे स्वरूप एक लाख रुपये आणि मानचिन्ह असे आहे. सन २००३ पासून विविध क्षेत्रांत उल्लेखनीय कार्य करणाऱ्या व्यक्ती आणि संस्थांना हा पुरस्कार प्रदान करण्यात आला आहे.
सैनिकांच्या पुनर्वसनासाठी कार्य करणाऱ्या संस्थेचा गौरव
यंदाचा संस्था स्तरावरील पुरस्कार सोलजर्स इंडिपेंडंट रिहॅबिलिटेशन फाउंडेशन, पुणे यांना प्रदान करण्यात येणार आहे. निवृत्त विंग कमांडर योगेश चिथडे आणि त्यांच्या पत्नी सुमेधा चिथडे यांनी या संस्थेची स्थापना केली आहे. भारतीय सैन्यदल तसेच निमलष्करी दलातील वीर जवान, शहीद सैनिकांची कुटुंबे आणि दिव्यांग जवान यांच्या पुनर्वसन व कल्याणासाठी संस्था कार्यरत आहे.
सैनिकांच्या कुटुंबीयांना सामाजिक व आर्थिक पाठबळ देणे, सीयाचीन परिसरातील सैनिकांसाठी ऑक्सिजन जनरेशन प्लांट उभारणे, शहीद कुटुंबांचे पुनर्वसन, दिव्यांग जवानांना मदत आणि शहीद सैनिकांच्या मुलांना शैक्षणिक सहाय्य यांसह विविध उपक्रम संस्थेमार्फत राबविले जातात. ‘माझा सैनिक, माझे कर्तव्य’ अभियानासह प्रत्यक्ष सीमेवर जाऊन सैनिकांच्या गरजा जाणून घेऊन मदत करण्याचे कामही संस्था करते. नागरिकांच्या स्वेच्छादान आणि लोकसहभागातून चालणाऱ्या या संस्थेच्या कार्याची दखल घेत हा पुरस्कार जाहीर करण्यात आला आहे.
कापूस उत्पादनातील योगदानाबद्दल डॉ. श्रीरंग लाड यांचा सन्मान
व्यक्ती स्तरावरील पुरुषोत्तम पुरस्कारासाठी पद्मश्री डॉ. श्रीरंग देवबा लाड (दादा लाड) यांची निवड करण्यात आली आहे. माळसोन्ना, जि. परभणी येथील डॉ. लाड यांनी १९७०च्या दशकापासून शेतकरी हितासाठी कार्य केले आहे. कापसाचे एकरी उत्पादन वाढविण्यासाठी त्यांनी विकसित केलेले स्वदेशी तंत्रज्ञान ‘दादा लाड कापूस तंत्रज्ञान’ म्हणून ओळखले जाते.
महाराष्ट्र, गुजरात, तेलंगणा, आंध्र प्रदेश आणि तमिळनाडू या राज्यांतील शेतकऱ्यांनी हे तंत्रज्ञान स्वीकारल्याचे फाउंडेशनच्या पदाधिकाऱ्यांनी सांगितले. तसेच मराठवाड्यातील लाल कंधारी आणि देवणी या देशी गोवंशाच्या जातींचे जतन व संवर्धनासाठीही त्यांनी कार्य केले आहे.
कृषी क्षेत्रातील योगदान आणि कापूस उत्पादनासाठी केलेल्या कार्याची दखल घेत भारत सरकारने त्यांना पद्मश्री पुरस्काराने सन्मानित केले आहे. वसंतराव नाईक मराठवाडा कृषी विद्यापीठातर्फे त्यांना मानद डॉक्टरेट पदवीही प्रदान करण्यात आली आहे.
९ ऑक्टोबरला पुरस्कार वितरण समारंभ
पुरुषोत्तम पुरस्कारांचा वितरण समारंभ शुक्रवार, दि. ९ ऑक्टोबर २०२६ रोजी सकाळी ९.३० वाजता पूज्य साने गुरुजी विद्या प्रसारक मंडळाच्या प्रांगणात आयोजित करण्यात आला आहे. या समारंभात दोन्ही पुरस्कारार्थींचा गौरव करण्यात येणार आहे.
