जय हनुमान व श्री देवराज बुवा गणेश मंडळांची भव्य मिरवणूक; डीजेमुक्त विसर्जनाला उत्स्फूर्त प्रतिसाद
शिरोळ : प्रतिनिधी
शिरोळ, वांजरवाडा, ता. निलंगा, जि. लातूर येथे जय हनुमान गणेश मंडळ व श्री देवराज बुवा गणेश मंडळाच्या वतीने गणेशमूर्तींची मोठ्या थाटामाटात मिरवणूक काढून विसर्जन करण्यात आले. गेल्या दहा दिवसांपासून परिसरात भक्तिमय वातावरण होते.
सनईच्या सुरांनी वातावरण अधिक भक्तिमय झाले होते. मिरवणुकीत महिला व पुरुष मोठ्या संख्येने सहभागी झाले. विशेष म्हणजे यंदा डीजेमुक्त गणेश विसर्जन करण्यात आले असून त्याला ग्रामस्थांचा चांगला प्रतिसाद मिळाला. सर्व जाती-धर्माचे नागरिक एकत्र येऊन उत्सव साजरा करत सामाजिक सलोख्याचा संदेश दिला.
दोन्ही गणेश मंडळांच्या अध्यक्ष, उपाध्यक्ष, पदाधिकारी व कार्यकर्त्यांनी शांततेत विसर्जन सोहळा पार पाडल्याने ग्रामस्थांमध्ये आनंदाचे वातावरण होते. यापुढेही अशाच पद्धतीने शांततेत व सामाजिक एकोप्याने गणेशोत्सव साजरा व्हावा, अशी भावना ग्रामस्थांनी व्यक्त केली.
