५० हून अधिक विद्यार्थी गटांचा सहभाग; तंत्रज्ञानाधारित उपाय आणि नाविन्यपूर्ण कल्पनांचे सादरीकरण
भोर : राजगड टेक्निकल कॅम्पसमध्ये विद्यार्थ्यांच्या नवकल्पना, तांत्रिक कौशल्य आणि समस्या सोडविण्याच्या क्षमतेला चालना देणाऱ्या ‘स्मार्ट इंडिया हॅकाथॉन’ (SIH) उपक्रमाचे उत्साहात आयोजन करण्यात आले. या उपक्रमात ५० हून अधिक विद्यार्थी गटांनी उत्स्फूर्त सहभाग नोंदविला.
कार्यक्रमाचे उद्घाटन पॉलिटेक्निक महाविद्यालयाचे प्राचार्य डॉ. खोपडे यांच्या हस्ते करण्यात आले. यावेळी प्राचार्य डॉ. संजय पाटील यांनी विद्यार्थ्यांनी केवळ शैक्षणिक ज्ञानापुरते मर्यादित न राहता नाविन्यपूर्ण विचार, तंत्रज्ञानाचा प्रभावी वापर आणि प्रत्यक्ष जीवनातील समस्यांवर उपाय शोधण्याची वृत्ती विकसित करावी, असे प्रतिपादन केले. स्मार्ट इंडिया हॅकाथॉनसारखे उपक्रम विद्यार्थ्यांच्या सर्वांगीण विकासासाठी महत्त्वपूर्ण असल्याचे त्यांनी सांगितले.
हॅकाथॉनमध्ये विद्यार्थ्यांनी विविध वास्तविक जीवनातील समस्यांवर आधारित नाविन्यपूर्ण कल्पना, तांत्रिक उपाय आणि प्रकल्पांचे सादरीकरण केले. टीमवर्क, सर्जनशीलता, तांत्रिक कौशल्य आणि समस्या निराकरणाची क्षमता यांचा विद्यार्थ्यांनी प्रभावीपणे उपयोग केला.
समारोपप्रसंगी पारितोषिक वितरण समारंभ इस्टेट मॅनेजर राहुल खामकर यांच्या हस्ते झाला. विद्यार्थ्यांच्या उत्स्फूर्त सहभागाचे कौतुक करताना त्यांनी नवीन कल्पनांना प्रत्यक्ष प्रकल्पांचे स्वरूप देऊन समाजोपयोगी तंत्रज्ञान विकसित करण्यासाठी सातत्याने प्रयत्न करण्याचे आवाहन केले.
या कार्यक्रमाचे आयोजन विभागप्रमुख प्रा. भुषण बोऱ्हाडे यांनी केले. सूत्रसंचालन अक्षता निकम यांनी केले. कार्यक्रमाच्या यशस्वी आयोजनासाठी संस्थेचे व्यवस्थापन, प्राचार्य डॉ. संजय पाटील, डीन, सर्व विभागप्रमुख, इस्टेट मॅनेजर राहुल खामकर, प्राध्यापकवर्ग, समन्वयक, विद्यार्थी व कर्मचारी यांचे सहकार्य लाभले.
५० हून अधिक विद्यार्थी गटांचा सहभाग, नाविन्यपूर्ण कल्पना आणि तंत्रज्ञानाधारित उपाययोजनांमुळे राजगड टेक्निकल कॅम्पसमध्ये ‘Innovation, Collaboration & Problem Solving’ या संकल्पनेला चालना मिळाली.
