मंत्रिमंडळ बैठकीपूर्वी मुंबईत निवेदन; पावसातील खंड, पाणीटंचाई व पीकस्थितीचा मुद्दा मांडला
चांदवड : तालुक्यातील दुष्काळसदृश परिस्थिती आणि शेतकऱ्यांच्या अडचणींच्या पार्श्वभूमीवर चांदवडचा महाराष्ट्र शासनाच्या दुष्काळसदृश ‘Trigger-1’ यादीत समावेश करण्यात यावा, अशी मागणी शिवसेना सचिव भाऊसाहेब चौधरी यांनी उपमुख्यमंत्री तथा शिवसेना मुख्यनेते एकनाथ शिंदे यांच्याकडे केली.
मुंबई येथे राज्य मंत्रिमंडळाच्या बैठकीपूर्वी चौधरी यांनी उपमुख्यमंत्री शिंदे यांची भेट घेऊन चांदवड तालुक्यातील परिस्थितीबाबत चर्चा केली. यावेळी ‘Trigger-1’ यादीत तालुक्याचा समावेश करण्याच्या मागणीचे निवेदन सादर करण्यात आले.
यंदा तालुक्यात पावसाची अनिश्चितता तसेच पावसातील दीर्घ खंडामुळे खरीप पिकांवर परिणाम झाल्याचे निवेदनात नमूद करण्यात आले आहे. अनेक शेतकरी पावसावर अवलंबून असून काही भागांत पाणीटंचाईची परिस्थिती निर्माण होत असल्याने शेतकरी व पशुपालकांसमोरील अडचणी वाढल्याचे चौधरी यांनी निदर्शनास आणून दिले.
तालुक्यातील प्रत्यक्ष पर्जन्यस्थिती, पिकांची अवस्था आणि शेतकऱ्यांचे नुकसान यांचा आढावा घेऊन ‘Trigger-1’ अंतर्गत चांदवडचा समावेश करण्याबाबत शासनाने निर्णय घ्यावा, अशी मागणी करण्यात आली. यामुळे पुढील दुष्काळ मूल्यांकन प्रक्रिया आणि लागू होणाऱ्या उपाययोजनांच्या दृष्टीने शेतकऱ्यांना मदत मिळू शकते, असा मुद्दाही मांडण्यात आला.
शेतकऱ्यांच्या प्रश्नांसाठी शासनस्तरावर सातत्याने पाठपुरावा सुरू ठेवणार असल्याचे भाऊसाहेब चौधरी यांनी सांगितले. यावेळी राज्याचे मंत्री दादा भुसे तसेच माजी आमदार धनराज महाले उपस्थित होते.
चांदवडचा ‘Trigger-1’ यादीत समावेश करण्याची मागणी विविध स्तरांवरून पुढे येत असल्याने शासन याबाबत कोणता निर्णय घेते, याकडे तालुक्यातील शेतकऱ्यांचे लक्ष लागले आहे.
