पहिल्याच दिवशी ३६१ उमेदवारी अर्जांची विक्री; बिनविरोध निवडीच्या प्रयत्नांदरम्यान श्रीगोंद्यातून उमेदवारी
श्रीगोंदा : प्रतिनिधी : अहिल्यानगर जिल्हा मध्यवर्ती सहकारी बँकेच्या संचालक मंडळाच्या पंचवार्षिक निवडणुकीची प्रक्रिया सुरू झाली असून, उमेदवारी अर्ज दाखल करण्याच्या पहिल्याच दिवशी श्रीगोंदा तालुक्यातून माजी आमदार व बँकेचे माजी संचालक राहुल कुंडलिकराव जगताप यांनी आपला उमेदवारी अर्ज दाखल केला. २८ सप्टेंबर रोजी अर्ज प्रक्रिया सुरू झाल्यानंतर दाखल झालेला हा पहिला अर्ज असल्याची माहिती समोर आली आहे. याच दिवशी तब्बल ३६१ इच्छुकांनी उमेदवारी अर्ज नेले.
जिल्हा बँकेच्या २१ संचालक पदांसाठी ही निवडणूक होत आहे. उमेदवारी अर्ज दाखल करण्याची मुदत ५ ऑक्टोबरपर्यंत आहे. त्यामुळे आगामी काळात आणखी किती उमेदवार अर्ज दाखल करतात, याकडे सहकार क्षेत्राचे लक्ष लागले आहे.
बिनविरोध निवडीसाठी सर्वपक्षीय प्रयत्न
दरम्यान, जिल्हा बँकेची निवडणूक बिनविरोध करण्यासाठी जिल्ह्यातील प्रमुख नेत्यांकडून प्रयत्न सुरू आहेत. संगमनेर येथे झालेल्या सर्वपक्षीय बैठकीत दुष्काळी परिस्थिती, शेतकरी व सहकार क्षेत्रासमोरील आव्हाने लक्षात घेता निवडणूक बिनविरोध करण्यासाठी प्रयत्न करण्याची भूमिका व्यक्त करण्यात आली होती.
या पार्श्वभूमीवर राहुल जगताप यांनी पहिल्याच दिवशी अर्ज दाखल केल्याने श्रीगोंदा मतदारसंघातील निवडणूक प्रक्रियेबाबत उत्सुकता वाढली आहे. मात्र, अंतिम चित्र उमेदवारी अर्जांची छाननी आणि त्यानंतरच्या माघारीच्या प्रक्रियेनंतरच स्पष्ट होणार आहे.
अर्ज माघारीनंतर चित्र स्पष्ट होणार
निवडणूक कार्यक्रमानुसार उमेदवारी अर्ज दाखल करण्याची अंतिम मुदत ५ ऑक्टोबर आहे. त्यानंतर छाननी व अर्ज माघारीची प्रक्रिया पूर्ण झाल्यानंतर अंतिम उमेदवार निश्चित होतील. उपलब्ध निवडणूक कार्यक्रमानुसार २ नोव्हेंबर २०२६ रोजी मतदान, तर ३ नोव्हेंबर रोजी मतमोजणी होणार आहे.
त्यामुळे सध्या दाखल झालेले उमेदवारी अर्ज हे अंतिम लढतीचे चित्र मानता येणार नाही. कोण उमेदवारी कायम ठेवतो आणि कोण माघार घेतो, यावर निवडणूक बिनविरोध होते की मतदानाची प्रक्रिया पार पडते, हे अवलंबून राहणार आहे.
पहिल्याच दिवशी मोठ्या संख्येने उमेदवारी अर्जांची विक्री आणि श्रीगोंद्यातून राहुल जगताप यांचा अर्ज दाखल झाल्यामुळे अहिल्यानगर जिल्हा बँकेच्या निवडणूक प्रक्रियेकडे सहकार क्षेत्रासह जिल्ह्यातील राजकीय वर्तुळाचे लक्ष लागले आहे.
