विविध प्रमाणपत्रांसाठी २५७ अर्ज दाखल; दोनशेहून अधिक नागरिकांनी घेतला शासकीय योजनांचा लाभ
मुंबई | प्रतिनिधी
महाराष्ट्र शासनाच्या इतर मागास बहुजन कल्याण विभाग आणि तहसील कार्यालय, बोरिवली यांच्या संयुक्त विद्यमाने भटक्या-विमुक्त जाती-जमातीतील नागरिकांना विविध शासकीय योजनांचा लाभ मिळवून देण्यासाठी ‘राष्ट्रपिता ते राष्ट्रनेता अभियानांतर्गत’ विशेष शिबिराचे आयोजन करण्यात आले. सोमवार, दि. २८ सप्टेंबर २०२६ रोजी बोरिवली पूर्व येथील फुलपाखरू उद्यान परिसरातील विमुक्त भटके जनजाती विकास परिषद अखिल भारतीय संघटनेच्या कार्यालयात हे शिबिर पार पडले.
शिबिरात जात प्रमाणपत्रासाठी ५९, अधिवास प्रमाणपत्रासाठी ३२, आधार कार्डसाठी ६३, शिधापत्रिकेसाठी २६, आयुष्मान भारत कार्डसाठी ३५, संजय गांधी निराधार योजनेसाठी २२ आणि उत्पन्न दाखल्यासाठी २० अर्ज दाखल करण्यात आले. विविध शासकीय योजनांची माहिती घेण्यासाठी दोनशेहून अधिक नागरिकांनी शिबिराला भेट दिली.
शिबिराला नागरिकांचा मोठा प्रतिसाद मिळाल्याने नियोजित वेळेनंतरही शासकीय अधिकारी व कर्मचारी नागरिकांची कामे पूर्ण करण्यासाठी सायंकाळी ५ वाजेपर्यंत कार्यरत होते. विविध शासकीय योजनांचा लाभ मिळविण्यासाठी आवश्यक प्रमाणपत्रे व कागदपत्रांची माहिती नागरिकांना यावेळी देण्यात आली.
या शिबिरासाठी पत्रकार भारत कवितके यांना अतिथी म्हणून निमंत्रित करण्यात आले होते. यावेळी भटके विमुक्त जनजाती विकास परिषद अखिल भारतीय संघटनेचे महाराष्ट्र प्रदेश अध्यक्ष श्रीकुमार शिंदे, मुंबई प्रदेश अध्यक्ष सहदेव रसाळ, समाजसेवक रामकृष्ण बेलवलकर, चंद्रकांत शिंदे, बबन मोहिते, अनघा चांगले, अर्चना लष्कर, शोभा माने, लहू पवार, चंद्रकांत उबाळे, माने ताई, मल्हारी जी, संदेश भागवत आदी उपस्थित होते.
शिबिरात आलेल्या नागरिकांना आवश्यक सहकार्य करून उपक्रम यशस्वी करण्यासाठी इतर मागास बहुजन कल्याण विभागाचे मुंबई उपनगर संचालक विजय कुडवे, मुंबई शहरचे सहायक संचालक रविकिरण नाईक, नायब तहसीलदार श्री. जांभळे तसेच विविध शासकीय विभागांचे अधिकारी व कर्मचाऱ्यांनी सहकार्य केले.
शिबिराच्या यशस्वी आयोजनाबद्दल संघटनेचे राज्य कार्यवाह गिरीधर साळुंके यांनी शासकीय अधिकारी, कर्मचारी आणि सहकार्य करणाऱ्या सर्वांचे आभार मानले. भटक्या-विमुक्त समाजातील नागरिकांना शासकीय योजनांचा लाभ मिळावा यासाठी भविष्यात मुंबई शहर व उपनगरातील विविध भागांत अशा प्रकारची शिबिरे आयोजित करण्यासाठी सहकार्य केले जाईल, असेही यावेळी सांगण्यात आले.
