३३ ओबीसी जातींच्या केंद्रीय ओबीसी सूचीतील समावेशासाठी पुढील रणनीतीवर होणार चर्चा
उरण, दि. २ : महाराष्ट्रातील ३३ ओबीसी जाती व समाज समूहांचा केंद्र सरकारच्या केंद्रीय ओबीसी सूचीमध्ये समावेश करण्याच्या मागणीसाठी गेल्या अनेक वर्षांपासून कार्यरत असलेल्या महाराष्ट्र ओबीसी कृती समितीची कार्यकारिणी बैठक रविवार, दि. ४ ऑक्टोबर २०२६ रोजी उरण, जिल्हा रायगड येथे आयोजित करण्यात आली आहे. कराडी समाजाच्या वतीने या बैठकीचे आयोजन करण्यात आले आहे.
या बैठकीत संबंधित ओबीसी समाजांना केंद्र सरकारच्या ओबीसी आरक्षणाचा लाभ मिळण्यासाठी सुरू असलेल्या पाठपुराव्याचा आढावा घेण्यात येणार आहे. केंद्र व राज्य सरकारकडे करण्यात आलेली निवेदने, बैठका, पत्रव्यवहार तसेच आतापर्यंत झालेल्या कार्यवाहीवर सविस्तर चर्चा करण्यात येणार आहे.
विशेषतः केंद्रीय ओबीसी सूचीमध्ये संबंधित समाजांचा समावेश करण्याची प्रक्रिया पुढे नेण्यासाठी केंद्र सरकारकडे प्रभावीपणे पाठपुरावा करण्याबाबत तसेच या विषयावर विविध ओबीसी समाज संघटनांमध्ये व्यापक जनजागृती करण्यासाठी पुढील दिशा निश्चित केली जाणार आहे.
महाराष्ट्र ओबीसी कृती समितीच्या माध्यमातून या मागणीसाठी दिल्ली तसेच महाराष्ट्रात विविध स्तरांवर सातत्याने पाठपुरावा करण्यात आला आहे. संबंधित समाजांना केंद्र शासनाच्या शैक्षणिक प्रवेश, केंद्रीय सरकारी नोकऱ्या, शिष्यवृत्ती तसेच इतर केंद्रस्तरीय योजनांमध्ये उपलब्ध असलेल्या ओबीसी सुविधांचा लाभ मिळावा, हा या प्रयत्नांचा प्रमुख उद्देश असल्याचे समितीने सांगितले.
या कार्यकारिणी बैठकीस महाराष्ट्रातील विविध ओबीसी समाजांचे प्रतिनिधी, पदाधिकारी व कार्यकर्ते उपस्थित राहणार असून, बैठकीत पुढील कृती आराखड्याबाबत चर्चा करण्यात येणार आहे.
बैठकीचे ठिकाण : हॉटेल आनंदी, रेल्वे स्टेशनजवळ, उरण, जिल्हा रायगड
दिनांक : रविवार, ४ ऑक्टोबर २०२६
वेळ : दुपारी १२ ते ४ वाजेपर्यंत
महाराष्ट्र ओबीसी कृती समितीचे अध्यक्ष श्रावण फरकाडे तसेच कराडी समाज संघटनेच्या वतीने संबंधित सर्व पदाधिकारी व प्रतिनिधींनी बैठकीस उपस्थित राहून आपले विचार व सूचना मांडाव्यात, असे आवाहन करण्यात आले आहे.
