शासकीय परवानगीशिवाय स्फोटकांचा साठा केल्याचा आरोप; एकाला अटक, दोघे फरार
येवला : प्रतिनिधी
नाशिक जिल्ह्यातील येवला तालुक्यातील वाईबोथी येथे दहशतवाद विरोधी पथकाच्या (ATF) नाशिक युनिटने आणि येवला तालुका पोलिसांनी संयुक्त कारवाई करत मोठ्या प्रमाणात स्फोटकांचा साठा जप्त केला. साई मातोश्री स्टोन क्रशर परिसरात करण्यात आलेल्या कारवाईत ५ हजार ६५ जिलेटिन कांड्या आणि १ हजार ५९५ व्यावसायिक डिटोनेटर असा साठा पोलिसांच्या हाती लागला.
खदाणीच्या कामासाठी आवश्यक असलेल्या शासकीय परवानगीशिवाय हा स्फोटकांचा साठा ठेवण्यात आल्याचा पोलिसांचा आरोप आहे. या प्रकरणामुळे परिसरात खळबळ उडाली आहे.
पोलीस शिपाई सचिन दराडे यांच्या फिर्यादीवरून येवला तालुका पोलीस ठाण्यात याप्रकरणी गुन्हा दाखल करण्यात आला आहे. प्रकरणात नितीन भास्कर गायकवाड (रा. अंगणगाव), भगवान सुरेश वाघ (रा. वाईबोथी) आणि शरद आप्पासाहेब भड (रा. धामोडे) अशी तीन संशयितांची नावे समोर आली आहेत.
यापैकी भगवान सुरेश वाघ याला पोलिसांनी अटक केली असून नितीन गायकवाड आणि शरद भड हे दोघे फरार असल्याची माहिती आहे. फरार आरोपींचा शोध घेण्यासाठी पोलिसांकडून तपास सुरू आहे.
इतक्या मोठ्या प्रमाणात स्फोटकांचा साठा नेमका कुठून आणण्यात आला, त्यासाठी कोणाची मदत घेण्यात आली आणि या साठ्याचा वापर कशासाठी केला जाणार होता, याचा तपास पोलीस करत आहेत. पुढील तपासात या प्रकरणातील इतर बाबी स्पष्ट होण्याची शक्यता आहे.
