पोलीस दल आणि मच्छिमार बांधवांच्या समन्वयातून ‘सुरक्षित समुद्र, सुरक्षित रायगड’चा संदेश
पेण : प्रतिनिधी
रायगड जिल्ह्यातील पेण तालुक्यात दादर सागरी पोलीस ठाणे अंतर्गत आयोजित करण्यात आलेल्या सागरी सुरक्षा कबड्डी स्पर्धा २०२६ चा भव्य उद्घाटन सोहळा मोठ्या उत्साहात व जल्लोषात पार पडला. या उपक्रमातून रायगड जिल्हा पोलीस दल आणि मच्छिमार बांधव यांच्यातील संवाद, समन्वय व सहकार्य अधिक बळकट करण्याचा संदेश देण्यात आला.
या उद्घाटन सोहळ्यास रायगड जिल्ह्याच्या पोलीस अधीक्षक आचल दलाल, अपर पोलीस अधीक्षक अभिजीत शिवथरे, उपविभागीय पोलीस अधिकारी जालिंदर वालकूल तसेच वरिष्ठ पोलीस अधिकारी संदीप बागुल यांची प्रमुख उपस्थिती होती. पोलीस अधीक्षक आचल दलाल आणि पोलीस अधिकारी जालिंदर वालकूल यांच्या हस्ते कबड्डी स्पर्धेचे उद्घाटन करण्यात आले.
स्पर्धेदरम्यान दादर सागरी पोलीस ठाण्यातील पोलीस अधिकारी व कर्मचाऱ्यांनीही उत्स्फूर्त सहभाग नोंदवत कबड्डीच्या मैदानावर आपल्या खेळाचे प्रदर्शन केले. पोलीस कर्मचारी आणि मच्छिमार बांधवांमध्ये खेळाच्या माध्यमातून आपुलकीचे व मैत्रीपूर्ण वातावरण निर्माण झाले.
सागरी सुरक्षेच्या दृष्टीने मच्छिमार बांधव, सागररक्षक दल आणि रायगड जिल्हा पोलीस यांच्यातील समन्वय महत्त्वाचा आहे. समुद्रात उद्भवणाऱ्या आपत्कालीन परिस्थितीत तात्काळ प्रतिसाद देण्यासाठी परस्पर संवाद आणि सहकार्य वाढविणे, तसेच सागरी सुरक्षेबाबत जनजागृती करणे, हा या उपक्रमामागील प्रमुख उद्देश आहे.
‘एकजूट, सतर्कता आणि समन्वय’ या त्रिसूत्रीवर आधारित या कबड्डी स्पर्धेत पोलीस दल व मच्छिमार बांधवांचा उत्स्फूर्त सहभाग पाहायला मिळाला. खेळाच्या माध्यमातून सागरी सुरक्षेचा संदेश जनतेपर्यंत पोहोचविण्याचा प्रयत्न यावेळी करण्यात आला.
यावेळी ‘सुरक्षित समुद्र, सुरक्षित रायगड’ हा संदेश देण्यात आला. सागरी सुरक्षेसाठी पोलीस दल आणि स्थानिक मच्छिमार समाज यांच्यातील समन्वय अधिक दृढ करण्यासाठी अशा उपक्रमांची भूमिका महत्त्वाची असल्याचे यावेळी अधोरेखित झाले.
दादर सागरी पोलीस ठाण्याच्या या उपक्रमाचे परिसरातील नागरिक व मच्छिमार बांधवांकडून स्वागत करण्यात येत असून, सागरी सुरक्षेसाठी पोलीस दल सदैव तत्पर असल्याचा विश्वास या उपक्रमातून व्यक्त करण्यात आला.
