पंचनामे व शेतकऱ्यांच्या अडीअडचणी जाणून घेण्यासाठी दौरा; येवता, मानकी व पारस येथे भेटी
अकोला | प्रतिनिधी : राज्याचे महसूल मंत्री तथा कोरडा दुष्काळ राज्य उपसमितीचे प्रमुख चंद्रशेखर बावनकुळे हे शनिवार, दि. ३ ऑक्टोबर २०२६ रोजी अकोला जिल्ह्याच्या दौऱ्यावर येणार आहेत. दुष्काळग्रस्त शेतकऱ्यांच्या अडीअडचणी, पीक पंचनामे आणि विविध मागण्यांबाबत प्रत्यक्ष शेतकऱ्यांशी संवाद साधण्यासाठी हा दौरा आयोजित करण्यात आला आहे. भाजप नेते तथा विधिमंडळ प्रतोद आमदार रणधीर सावरकर यांनी ही माहिती दिली.
दौऱ्यादरम्यान सकाळी ९ ते १० वाजेपर्यंत अकोला शहर व आजूबाजूच्या परिसरातील शेतकऱ्यांकडून निवेदने स्वीकारण्यात येणार आहेत. त्यानंतर अकोला तालुक्यातील येवता येथे शेताच्या बांधावर जाऊन शेतकऱ्यांशी संवाद साधण्यात येणार आहे.
यानंतर बाळापूर तालुक्यातील मानकी येथे शेतकऱ्यांच्या बांधावर भेट देऊन दुष्काळी परिस्थितीची पाहणी केली जाणार आहे. तसेच पारस येथे शेतकऱ्यांची निवेदने स्वीकारण्यात येणार आहेत.
दुष्काळामुळे निर्माण झालेल्या परिस्थितीची प्रत्यक्ष पाहणी करून शेतकऱ्यांच्या समस्या जाणून घेण्याच्या दृष्टीने हा दौरा महत्त्वाचा ठरणार आहे. पंचनामे, नुकसानभरपाई आणि दुष्काळाशी संबंधित विविध प्रश्नांबाबत शेतकऱ्यांकडून निवेदने स्वीकारली जाणार आहेत.
या दौऱ्यात पालकमंत्री अॅड. आकाश फुंडकर, खासदार अनुप धोत्रे, आमदार रणधीर सावरकर, आमदार हरीश पिंपळे, आमदार प्रकाश भारसाकळे, महापौर सौ. शारदाताई खेडकर, जयंत मसने, संतोष शिवरकर, विजय अग्रवाल यांच्यासह पदाधिकारी, लोकप्रतिनिधी, जिल्हा पदाधिकारी आणि संबंधित अधिकारी उपस्थित राहणार आहेत.
