संग्रामपूर आयटीआयसमोर बसेस थांबविण्याची तथागत भाई आंभोरे यांची मागणी
संग्रामपूर : जळगाव जामोद–वरवट बकाल मार्गावर धावणाऱ्या एसटी बसेस संग्रामपूर येथील आयटीआय महाविद्यालयासमोर थांबत नसल्याने विद्यार्थ्यांची मोठी गैरसोय होत आहे. या प्रश्नाची दखल घेत महाराष्ट्र समाजभूषण तथागत भाई आंभोरे यांनी प्रशासनाला निवेदन देऊन आयटीआय महाविद्यालयासमोर अधिकृत बस थांबा देण्याची मागणी केली.
विविध गावांमधून विद्यार्थी आयटीआयमध्ये शिक्षणासाठी येतात. मात्र बस महाविद्यालयाजवळ थांबत नसल्याने विद्यार्थ्यांना संग्रामपूर शहरातून महाविद्यालयापर्यंत पायी जावे लागते. त्यामुळे विद्यार्थ्यांचा वेळ व श्रम वाया जात असून शैक्षणिक अडचणी निर्माण होत असल्याचे निवेदनात नमूद करण्यात आले आहे.
जळगाव जामोद–वरवट बकाल मार्गावरील संबंधित सर्व एसटी बसेसना आयटीआय महाविद्यालयासमोर अधिकृत थांबा देण्यात यावा, अशी मागणी करण्यात आली आहे. या मागणीची तातडीने दखल न घेतल्यास बुधवार, दि. ७ ऑक्टोबर २०२६ रोजी आयटीआय महाविद्यालयासमोर रास्ता रोको आंदोलन करण्यात येईल, असा इशारा तथागत भाई आंभोरे यांनी दिला आहे.
“विद्यार्थ्यांच्या प्रश्नासाठी संघर्ष सुरूच राहणार,” अशी भूमिका त्यांनी व्यक्त केली.
