प्रथम क्रमांक पटकावत महाविद्यालयाच्या शिरपेचात रोवला मानाचा तुरा
खेड : कुणबी शिक्षण प्रसारक संस्था, मुंबई संचलित तुकाराम बाबुराव कदम कला, विज्ञान व वाणिज्य महाविद्यालयाची विद्यार्थिनी कु. पूजा अजित भोसले हिने चिपळूण येथे आयोजित जिल्हास्तरीय हिंदी निबंध स्पर्धेत प्रथम क्रमांक पटकावत उल्लेखनीय यश संपादन केले.
‘हिंदी दिवस’निमित्त नवकोकण एज्युकेशन सोसायटी संचलित डी. बी. जे. स्वायत्त महाविद्यालय, चिपळूण येथील हिंदी विभाग व अंतर्गत गुणवत्ता हमी कक्ष यांच्या संयुक्त विद्यमाने जिल्हास्तरीय आंतरमहाविद्यालयीन निबंध स्पर्धेचे आयोजन करण्यात आले होते. रत्नागिरी जिल्ह्यातील विविध महाविद्यालयांतील विद्यार्थ्यांनी या स्पर्धेत सहभाग घेतला होता.
चुरशीच्या या स्पर्धेत पूजा भोसले हिने आपल्या प्रभावी लेखनकौशल्याच्या जोरावर प्रथम क्रमांक मिळवत महाविद्यालयाचा नावलौकिक वाढविला.
तिच्या या यशाबद्दल कुणबी शिक्षण प्रसारक संस्था, मुंबईचे पदाधिकारी, महाविद्यालयाचे प्राचार्य प्रा. विनोद लक्ष्मी नामदेव साळुंखे तसेच हिंदी विभागप्रमुख डॉ. जावेद शेख यांनी तिचे अभिनंदन करून पुढील वाटचालीस शुभेच्छा दिल्या. पूजा हिच्या यशाबद्दल प्राध्यापक, शिक्षकेतर कर्मचारी, विद्यार्थी आणि परिसरातून तिच्यावर कौतुकाचा वर्षाव होत आहे.
