कथा-कथन, कवी संमेलन, पुस्तक प्रकाशन व ‘महात्मा गांधी साहित्य भूषण’ पुरस्कार सोहळ्याने रंगला साहित्यिक मेळावा
कोल्हापूर प्रतिनिधी :
कोल्हापूर येथील भारत मंदिर सभागृहात के.एस.आय. पब्लिकेशनच्या वतीने ३१ वे ग्रामीण साहित्य संमेलन उत्साहात संपन्न झाले. सकाळी १० ते सायंकाळी ६ वाजेपर्यंत झालेल्या या संमेलनात कथा-कथन, कवी संमेलन, पुस्तक व स्मरणिका प्रकाशन तसेच विविध क्षेत्रांत उल्लेखनीय कार्य करणाऱ्या मान्यवरांचा ‘महात्मा गांधी साहित्य भूषण’ पुरस्काराने गौरव करण्यात आला.
कार्यक्रमाच्या प्रारंभी मान्यवरांच्या हस्ते सरस्वती प्रतिमेचे पूजन व दीपप्रज्वलन करण्यात आले. प्रमुख पाहुण्यांचे स्वागत व सत्कार करण्यात आल्यानंतर कवी इंगळी सरकार विलास पाटील यांनी प्रास्ताविक केले. विनायक कुलकर्णी यांच्या हस्ते विविध पुस्तके, प्रातिनिधिक काव्यसंग्रह व स्मरणिकेचे प्रकाशन करण्यात आले.
कथा-कथन सत्रात बाळासाहेब देशमुख यांनी ‘मंतरलेला वाडा’ ही कथा सादर केली. प्रमुख पाहुणे विनायक कुलकर्णी यांनी साहित्यिकांच्या लेखनातील सर्जनशीलतेचे महत्त्व सांगितले. संमेलनाध्यक्ष दत्तात्रय वारकड यांनी साहित्यिकांनी समाजाला दिशा देण्यासोबतच युवकांना मार्गदर्शन करण्याची भूमिका बजावावी, असे प्रतिपादन केले. सिने निर्माते-दिग्दर्शक काशिनाथ आहेर यांनीही उपस्थितांना मार्गदर्शन केले.
यानंतर झालेल्या कवी संमेलनात शेतकरी, दुष्काळ, नातेसंबंध, प्रेम, विनोद आणि सामाजिक विषयांवरील विविध आशयांच्या कविता सादर करण्यात आल्या. भारत कवितके यांनी ‘मला काय माहीत?’ ही वास्तववादी व विनोदी ढंगाची कविता सादर करून रसिकांची दाद मिळवली. कवी संमेलनाच्या अध्यक्षा मेघा ऊळागड्डे होत्या. मनिषा कांबळे, भाऊसाहेब कांबळे, सुरेखा वाडकर, मनिषा वराळे, माधुरी पंडित, ज्ञानेश्वर धायरीकर, कामत सर यांच्यासह अनेक कवी-कवयित्रींनी सहभाग घेतला.
यानंतर मान्यवरांच्या हस्ते ‘महात्मा गांधी साहित्य भूषण’ पुरस्कारांचे वितरण करण्यात आले. मुंबई प्रतिनिधी, पत्रकार, साहित्यिक, गीतकार व सामाजिक कार्यकर्ते भारत कवितके यांना त्यांच्या ‘आयुष्य उसवताना’ या आत्मचरित्रासाठी ‘महात्मा गांधी साहित्य भूषण’ पुरस्कार देऊन गौरविण्यात आले. संमेलनाला साहित्यप्रेमी, कवी, लेखक व रसिकांचा उत्स्फूर्त प्रतिसाद मिळाला.
