शंकर इंगळे यांची जिल्हा सरचिटणीसपदी नियुक्ती; नूतन पदाधिकाऱ्यांची बिनविरोध निवड
नांदेड : प्रतिनिधी – शिक्षक भारती संघटनेच्या वतीने माध्यमिक शिक्षकांची सहविचार सभा रविवार, दि. ४ ऑक्टोबर २०२६ रोजी जिल्हा परिषद कन्या शाळा, वजीराबाद, नांदेड येथे पार पडली. ज्येष्ठ मार्गदर्शक बालाजी थोटवे यांच्या अध्यक्षतेखाली झालेल्या या सभेत नांदेड जिल्हा कार्यकारिणीची पुनर्रचना करण्यात आली.
जिल्हा परिषद हायस्कूल, घुंगराळा, ता. नायगाव येथे कार्यरत असलेले शंकर वसंतराव इंगळे यांची शिक्षक भारतीच्या नांदेड जिल्हा सरचिटणीसपदी नियुक्ती करण्यात आली. तर कार्याध्यक्षपदी दिनेश इंदूरकर, उपाध्यक्षपदी चंद्रशेखर सुवर्णकार व संदीप कमठाने यांची बिनविरोध निवड झाली. कार्यकारिणी सदस्य म्हणून धोंगडे, कारभारी व विधाते किशोर यांची निवड करण्यात आली.
सभेला डॉ. भोजनकर, अक्कमवाड, ए. बी. कदम तसेच शिक्षक भारतीचे जिल्हाध्यक्ष संजय शेळगे यांची प्रमुख उपस्थिती होती. नवनिर्वाचित कार्यकारिणीचे राज्याध्यक्ष अशोक बेलसरे, आमदार कपील पाटील व राज्य कार्याध्यक्ष सुभाष मोरे यांनी अभिनंदन केले.
शिक्षकांच्या विविध प्रश्नांना प्रभावीपणे वाचा फोडून त्यांच्या न्याय्य हक्कांसाठी संघटितपणे काम करण्याचा निर्धार यावेळी नूतन कार्यकारिणीने व्यक्त केला.
