विद्यार्थिनींना बांबूपासून चटई व फुले बनविण्याचे प्रात्यक्षिक; स्वयंरोजगारासाठी प्रेरणा
प्रतिनिधी : जागतिक बांबू दिनानिमित्त डी. के. महिला महाविद्यालयाच्या कौटुंबिक संसाधन आणि व्यवस्थापन विभागाच्या वतीने हस्तनिर्मित बांबू कला कार्यशाळेचे आयोजन करण्यात आले. कार्यशाळेचे आयोजन डॉ. मधुमती दुर्गे यांनी केले.
महाविद्यालयाची विद्यार्थिनी कु. पायल चिखराम हिने ‘विद्यार्थिनी प्रशिक्षक’ म्हणून इतर विद्यार्थिनींना बांबूपासून आकर्षक चटई व फुले तयार करण्याचे प्रात्यक्षिक दिले. तिच्या हस्तकौशल्याचे उपस्थितांनी कौतुक केले.
कार्यक्रमाच्या अध्यक्षस्थानी प्राचार्य डॉ. टी. के. गेडाम होते. त्यांनी पारंपरिक हस्तकलेचे महत्त्व सांगून विद्यार्थिनींना स्वयंरोजगारासाठी प्रोत्साहित केले. प्रमुख अतिथी उपप्राचार्य डॉ. पल्लवी तागडे यांनी विद्यार्थिनींच्या कलागुणांचे तसेच विभागाच्या उपक्रमाचे कौतुक केले.
यावेळी प्राध्यापक, शिक्षकेतर कर्मचारी तसेच मोठ्या संख्येने विद्यार्थिनी उपस्थित होत्या. कार्यक्रमाचे संचालन व आभार प्रदर्शन श्री. अनिल बोरकर यांनी केले.
