ग्रामीण भागातील विद्यार्थी-पालकांना एकाच छताखाली शासकीय दाखले; धावपळ कमी झाल्याने मोठा दिलासा
सावर्डे (प्रतिनिधी) : ग्रामीण भागातील विद्यार्थी व पालकांना विविध शासकीय दाखले आणि आवश्यक कागदपत्रे सहज उपलब्ध व्हावीत, तसेच शासनाच्या कल्याणकारी योजना व उपक्रमांची माहिती थेट नागरिकांपर्यंत पोहोचावी, या उद्देशाने सह्याद्री शिक्षण संस्था संचलित गोविंदराव निकम माध्यमिक व उच्च माध्यमिक विद्यालय, सावर्डे येथे ‘सेवा संकल्प अभियान’अंतर्गत दाखले वाटप शिबिराचे आयोजन करण्यात आले.
भारताचे पंतप्रधान नरेंद्र मोदी यांच्या संवैधानिक पदावरील कार्यकाळास २५ वर्षे पूर्ण झाल्याच्या औचित्याने या उपक्रमाचे आयोजन करण्यात आले. ग्रामीण भागातील नागरिकांना विविध दाखल्यांसाठी वारंवार शासकीय कार्यालयात जावे लागू नये, त्यांचा वेळ व श्रम वाचावा आणि आवश्यक सेवा एकाच ठिकाणी उपलब्ध व्हाव्यात, हा या शिबिरामागील प्रमुख उद्देश होता.
शिबिरात तलाठी सर्कल सानिका राणे यांनी उपस्थित राहून विद्यार्थी व पालकांना विविध दाखल्यांबाबत आवश्यक मार्गदर्शन केले. विद्यालयाचे प्राचार्य राजेंद्र वारे, उपप्राचार्य विजय चव्हाण, पर्यवेक्षक महेश कुलकर्णी यांच्यासह शिक्षक व शिक्षकेतर कर्मचारी यावेळी उपस्थित होते.
विशेषतः इयत्ता दहावी, बारावी तसेच एनएमएमएस परीक्षेस प्रविष्ट होणाऱ्या विद्यार्थ्यांना या शिबिराचा मोठा लाभ झाला. शैक्षणिक परीक्षा, शिष्यवृत्ती, प्रवेश प्रक्रिया तसेच विविध शासकीय योजनांसाठी आवश्यक असणारी कागदपत्रे व दाखले उपलब्ध करून देण्यात आल्याने विद्यार्थी व पालकांची मोठी सोय झाली.
ग्रामीण भागातील नागरिकांना उत्पन्न, रहिवासी, अधिवास यांसारख्या विविध दाखल्यांसाठी शासकीय कार्यालयात जावे लागते. यामुळे वेळ, पैसा आणि श्रम खर्च होतात. ही बाब लक्षात घेऊन विद्यालयाच्या परिसरातच दाखले वाटप शिबिर आयोजित करण्यात आल्याने पालकांना मोठा दिलासा मिळाला. ‘शासन आपल्या दारी’ या संकल्पनेला प्रत्यक्ष कृतीची जोड देणारा हा उपक्रम ठरला.
या माध्यमातून शासनाच्या विविध योजना, सुविधा व नागरिकांसाठी असलेल्या उपक्रमांची माहिती देण्यात आली. पात्र लाभार्थ्यांनी शासनाच्या योजनांचा लाभ घ्यावा, यासाठी आवश्यक मार्गदर्शनही करण्यात आले. विद्यालयाने शिक्षणासोबतच विद्यार्थी, पालक आणि समाज यांच्यातील दुवा म्हणून सामाजिक बांधिलकी जपल्याचे या उपक्रमातून अधोरेखित झाले.
शाळेच्या परिसरातच आवश्यक दाखले व मार्गदर्शन उपलब्ध झाल्याने पालकांनी समाधान व्यक्त केले. विद्यार्थ्यांच्या शैक्षणिक गरजांसाठी आवश्यक कागदपत्रांची पूर्तता करताना होणारी धावपळ कमी झाल्याने या उपक्रमाचे पालकांनी स्वागत केले.
या सेवा संकल्प अभियानाचे यशस्वी आयोजन प्राचार्य राजेंद्र वारे यांच्या मार्गदर्शनाखाली करण्यात आले. विद्यालयातील शिक्षक व शिक्षकेतर कर्मचाऱ्यांनी शिबिराच्या आयोजनासाठी विशेष सहकार्य केले.
