जिल्हा परिषदेचे मुख्य कार्यकारी अधिकारी गुलाबराव खरात यांची उपोषणकर्त्यांना भेट; ८ आक्टोबर कंत्राटदारांची बैठक घेऊन कारवाईचे आश्वासन डोणगाव. डोणगाव येथील नळ पाणीपुरवठा योजनेअंतर्गत तब्बल ४ कोटी ७३ लाख ५९ हजार रुपयांच्या मंजूर निधीपैकी ३ कोटी २५ लाख ५० हजार रुपये खर्च झाले असून ९५ टक्के भौतिक प्रगति झाल्याचा दावा कागदोपत्री केला जात आहे. मात्र, एवढा मोठा निधी खर्च होऊनही डोणगाववासीय आजही पाण्यापासून वंचित आहेत. या योजनेत मोठ्या प्रमाणावर गैरव्यवहार झाल्याचा संशय व्यक्त करत, योजनेची सखोल चौकशी व दोषींवर कारवाईच्या मागणीसाठी गेल्या ९ दिवसांपासून मेहकर पंचायत समितीसमोर राष्ट्रवादी काँग्रेसचे(अजित पवार गट)प्रशांत पाटील हे साखळी उपोषण करीत आहेत.
मिळालेल्या माहितीनुसार, ग्रामीण पाणीपुरवठा उपविभाग मेहकर अंतर्गत डोणगावच्या पाणीपुरवठा योजनेची मूळ अंदाजपत्रकीय किंमत ४७३.५९ लाख रुपये आहे. कागदपत्रांनुसार काम ९५% पूर्ण दाखवून ३२५.५० लाख रुपये खर्च झाल्याचे स्पष्ट होते. तरीही प्रत्यक्ष गावात पाणीपुरवठा सुरळीत न झाल्याने ग्रामस्थांमध्ये तीव्र असंतोष पसरला आहे. मु.
का. अ. गुलाबराव खरात यांची मध्यस्ती उपोषणकर्त्यांच्या मागण्यांची दखल घेत ७ आक्टोबर रोजी जिल्हा परिषदेचे मुख्य कार्यकारी अधिकारी (CEO) गुलाबराव खरात यांनी मेहकर येथील उपोषणस्थळाला प्रत्यक्ष भेट दिली आणि प्रशांत पाटील सह आंदोलकांशी चर्चा केली. योजनेतील अनियमितता व नागरिकांची होणारी गैरसोय लक्षात घेता, त्यांनी ८ आक्टोबर रोजी संबंधित कंत्राटदारांची तातडीची बैठक बोलावून योग्य ती कडक कारवाई करण्याचे स्पष्ट आश्वासन दिले आहे.
प्रशासनाने दिलेल्या आश्वासनानंतर आता कंत्राटदार व संबंधित अधिकाऱ्यांवर काय कारवाई होते आणि डोणगाववासीयांची पिण्याच्या पाण्याची समस्या कधी सुटते, याकडे संपूर्ण तालुक्याचे लक्ष लागले आहे.
