पारगाव ते मलठण रस्त्यावर निकृष्ट कामाचा आरोप; चौकशीसह सुरक्षिततेच्या उपाययोजना करण्याची मागणी
शिरूर : हायब्रीड अॅन्युईटी मॉडेलअंतर्गत अष्टविनायक महामार्गाच्या पारगाव ते मलठण या मार्गावरील रस्त्याचे देखभाल व दुरुस्तीचे काम सध्या सुरू आहे. या कामाच्या दर्जाबाबत स्थानिक ग्रामस्थांनी गंभीर प्रश्न उपस्थित केले असून, रस्त्यावर डांबरीकरणाऐवजी केवळ काळे साहित्य टाकून डांबरीकरण झाल्याचे दाखविले जात असल्याचा आरोप ग्रामस्थांनी केला आहे.
या रस्त्याची देखभाल व दुरुस्तीची जबाबदारी बेल्हेकर इन्फ्रा प्रायव्हेट लिमिटेड या कंपनीकडे असल्याचे सांगण्यात येत आहे. प्रत्यक्षात रस्त्याची अवस्था सुधारण्याऐवजी केवळ काळे साहित्य टाकून काम पूर्ण झाल्याचे दाखविले जात असल्याचा दावा ग्रामस्थांनी केला आहे. त्यामुळे शासनाच्या निधीचा योग्य वापर होत आहे का, कामाचा दर्जा कोणत्या निकषांनुसार तपासला जात आहे, याची सखोल चौकशी करण्याची मागणी करण्यात आली आहे.
रस्त्याचे काम सुरू असताना वाहनचालकांच्या सुरक्षिततेसाठी आवश्यक असलेले काम सुरू असल्याचे फलक, एकेरी वाहतुकीचे दिशादर्शक फलक तसेच सुरक्षा व्यवस्था पुरेशा प्रमाणात दिसून येत नसल्याचे ग्रामस्थांचे म्हणणे आहे. त्यामुळे या मार्गावर अपघाताचा धोका वाढण्याची शक्यता आहे.
तसेच या मार्गावर आवश्यक त्या ठिकाणी स्पीडब्रेकर बसविण्यात यावेत, अशीही मागणी ग्रामस्थांनी केली आहे. विशेषतः वस्ती, शाळा, बाजारपेठ, चौक तसेच नागरिकांची वर्दळ असलेल्या ठिकाणी वाहतुकीचा वेग नियंत्रित करण्यासाठी योग्य नियोजन करून स्पीडब्रेकर बसविण्यात यावेत, अशी मागणी आहे.
रस्त्याच्या दुरुस्तीचे काम निकृष्ट दर्जाचे असल्यास संबंधित विभागाने प्रत्यक्ष पाहणी करून कामाची गुणवत्ता तपासावी. कामात त्रुटी आढळल्यास संबंधित ठेकेदाराला आवश्यक सूचना देऊन नियम व निकषांनुसार दर्जेदार काम करून घ्यावे, अशी मागणी ग्रामस्थांनी केली आहे.
केवळ रस्त्यावर काळे साहित्य टाकून काम पूर्ण झाल्याचे दाखविण्याऐवजी प्रत्यक्षात टिकाऊ व दर्जेदार डांबरीकरण करण्यात यावे. तसेच कामाच्या ठिकाणी आवश्यक सुरक्षा फलक, एकेरी वाहतुकीचे नियोजन, योग्य दिशादर्शक फलक आणि आवश्यक त्या ठिकाणी स्पीडब्रेकर बसविण्यात यावेत, अशी मागणी स्थानिक ग्रामस्थांकडून करण्यात आली आहे.
या संपूर्ण कामाची संबंधित विभागाने तातडीने चौकशी करून वस्तुस्थिती स्पष्ट करावी आणि काम पारदर्शक पद्धतीने व गुणवत्तेच्या निकषांनुसार करून घ्यावे, अशी मागणी जोर धरत आहे.
