फत्तेचंद जैन विद्यालयाचा एक डाव व १८ गुणांनी पराभव; विभागस्तरीय स्पर्धेसाठी संघाची निवड
चिखली : पिंपरी-चिंचवड महानगरपालिका, पुणे जिल्हा क्रीडा परिषद आणि गणेश इंटरनॅशनल स्कूल, चिखली यांच्या संयुक्त विद्यमाने आयोजित जिल्हास्तरीय खो-खो स्पर्धेत श्रीमती शेषाबाई देवराव गणगे प्रशालेच्या १४ वर्षांखालील मुलांच्या संघाने दणदणीत कामगिरी करत प्रथम क्रमांक पटकावला.
अंतिम सामन्यात गणगे प्रशालेच्या संघाने श्री फत्तेचंद जैन माध्यमिक विद्यालयाच्या संघाचा एक डाव व १८ गुणांनी पराभव करत विजेतेपदावर शिक्कामोर्तब केले.
स्पर्धेतील प्रत्येक सामन्यात गणगे प्रशालेच्या खेळाडूंनी वेग, चपळता, अचूक पकड आणि उत्कृष्ट सांघिक नियोजनाच्या जोरावर प्रभावी खेळ केला. अंतिम सामन्यातही सुरुवातीपासून आक्रमक खेळ करत प्रतिस्पर्धी संघावर दबाव कायम ठेवला. खेळाडूंच्या उल्लेखनीय कामगिरीमुळे संघाने मोठ्या फरकाने विजय मिळवला.
या विजयानंतर गणगे प्रशालेच्या संघाची विभागस्तरीय खो-खो स्पर्धेसाठी निवड झाली आहे. संघाच्या या यशाबद्दल शाळेचे मुख्याध्यापक, क्रीडा शिक्षक, शिक्षक व शिक्षकेतर कर्मचारी तसेच पालकांनी खेळाडूंचे अभिनंदन केले. आगामी विभागस्तरीय स्पर्धेसाठी संघाला शुभेच्छा देण्यात आल्या.
