सर्वधर्मीय ग्रामस्थांचा उत्स्फूर्त सहभाग; पावसासाठी दुर्गामातेला साकडे
शिरोळ प्रतिनिधी | शिरोळ-वांजरवाडा, ता. निलंगा, जि. लातूर
निलंगा तालुक्यातील शिरोळ-वांजरवाडा येथील दुर्गामाता मंदिरात दरवर्षीप्रमाणे यंदाही नवरात्रोत्सवाला सुरुवात झाली आहे. या उत्सवात गावातील विविध जाती-धर्मांचे नागरिक एकत्र येऊन भक्तिभावाने सहभागी होत आहेत. त्यामुळे मंदिर परिसरात भक्तिमय वातावरण निर्माण झाले आहे.
दुर्गामाता मंदिर नवरात्रोत्सव समितीचे अध्यक्ष, उपाध्यक्ष, सचिव, सदस्य, आराधी मंडळ तसेच देवीचे पुजारी नऊ दिवस मनोभावे देवीची सेवा करतात. दररोज सकाळी आठ वाजता देवीची पूजा व आरती केली जाते. तसेच सायंकाळी आठ वाजता पूजा आणि आरतीचा कार्यक्रम होतो. या वेळी गावातील महिला, पुरुष, लहान मुले आणि ज्येष्ठ नागरिक मोठ्या संख्येने उपस्थित राहतात.
सायंकाळच्या आरतीनंतर आराधी मंडळाचा कार्यक्रम आयोजित केला जातो. नवरात्रोत्सवाच्या नऊ दिवसांत दररोज विविध धार्मिक व सांस्कृतिक कार्यक्रमांचे आयोजन करण्यात येते. या कार्यक्रमांमध्ये गावातील तरुणांसह ग्रामस्थ उत्साहाने सहभागी होतात.
गावात अनेक वर्षांपासून नवरात्रोत्सवाची परंपरा जपली जात आहे. या उत्सवाच्या माध्यमातून ग्रामस्थांमध्ये एकोपा, श्रद्धा आणि सामाजिक सलोखा वाढीस लागतो.
यंदा पावसाची गरज लक्षात घेऊन गावातील भाविकांनी दुर्गामातेच्या चरणी चांगला पाऊस पडावा, शेती बहरावी आणि शेतकरी सुखी व्हावेत, अशी प्रार्थना केली आहे. नवरात्रोत्सवाच्या निमित्ताने संपूर्ण गावात उत्साहाचे वातावरण आहे.
