सारथी महाराष्ट्राचा दि २०/११/२०२५
सावनेर तालुका प्रतिनिधी:- नरेश गें कनोजे
खापरखेडा : नागपूर जिल्ह्यातील खापरखेडा पोलिस ठाण्याच्या हद्दीतील जयभोले नगर परिसरात शुक्रवारी एक दुर्दैवी घटना घडली. कपडे वाळवत असताना विजेचा धक्का लागून एका आई आणि मुलाचा मृत्यू झाला. निर्मला उत्तम सोनटक्के (वय ५१) आणि त्यांचा मुलगा लोकेश उत्तम सोनटक्के (वय ३१) अशी मृतांची नावे आहेत. मिळालेल्या माहितीनुसार, लोकेश भानेगाव ओपनकास्ट कोळसा खाणीत एका खासगी कंपनीत काम करत होता. रात्रपाळी संपवून तो शुक्रवारी सकाळी घरी परतला आणि झोपी गेला होता. त्याची आई निर्मला अंघोळ झाल्यावर नेहमीप्रमाणे लोखंडी तारेवर कपडे वाळवत होत्या. या तारेच्या वरच्या भागातून जिवंत विद्युत तारा जात होत्या. कपड्यांना हात लावताच निर्मला यांना जोरदार विजेचा धक्का बसला. आईच्या ओरडण्याचा आवाज ऐकून गाढ झोपेत असलेला लोकेश तत्काळ जागा झाला. आई विजेच्या तारेला चिकटून असल्याचे पाहून त्याने तिला वाचवण्यासाठी धाव घेतली. “आई थांब” असे म्हणत त्याने आईला स्पर्श करताच त्यालाही जोरदार विजेचा धक्का बसला. आईला वाचवण्याच्या प्रयत्नात माय-लेकांचा घटनास्थळीच दुर्दैवी मृत्यू झाला. या घटनेने जयभोले नगर परिसरात शोककळा पसरली आहे. लोकेश अविवाहित होता, तर त्याचे वडील सिव्हिल मिस्त्री म्हणून काम करतात. सायंकाळी शोकाकुल वातावरणात माय-लेकांवर अंत्यसंस्कार करण्यात आले.
खापरखेडा पोलिसांनी या प्रकरणी अकस्मात मृत्यूची नोंद केली आहे. वरिष्ठ पोलिस निरीक्षक हरिष रुमकर या घटनेचा पुढील तपास करत आहेत.
