शहादा | प्रतिनिधी :
धडगाव वनविभाग यांनी धडगाव तालुक्यातील बिलगाव (प्रादेशिक) वनक्षेत्रात मोठी कारवाई करत सावऱ्या (कं.नं.७६) वनक्षेत्रातील अतिदुर्गम भागातून तस्करीच्या उद्देशाने लपवून ठेवलेला सुमारे २९ हजार ७२५ रुपये किमतीचा अवैध सागवान साठा जप्त केला आहे.
दिनांक १४ फेब्रुवारी २०२६ रोजी भुषा परिमंडळातील बिलगाव (निलदयपाडा) शिवारात जंगल परिसरात सागवान दांड्यांचा साठा दडवून ठेवल्याची गुप्त माहिती वनविभागाला मिळाली होती. या माहितीच्या आधारे बिलगाव रेंज स्टाफने तातडीने गस्त व शोधमोहीम सुरू केली. सखोल तपासादरम्यान जंगलातील विविध ठिकाणी लपवून ठेवलेले ४४ नग साग दांडे (१.१४७ घनमीटर) व १ साग चौपट (०.०४२ घनमीटर) असा एकूण १.१८९ घनमीटर मुद्देमाल आढळून आला.
हा साठा ज्या ठिकाणी मिळाला तो भाग अत्यंत डोंगराळ व दुर्गम असून तेथे वाहनांची ये-जा पूर्णतः अशक्य होती. त्यामुळे वन कर्मचाऱ्यांनी सुमारे २ ते ३ किलोमीटरची पायपीट करत जप्त केलेले सागवान लाकूड स्वतःच्या खांद्यावर (शिरओझे) वाहून मुख्य रस्त्यापर्यंत आणले. त्यानंतर खाजगी वाहनाच्या साहाय्याने हा सर्व मुद्देमाल रात्री उशिरा धडगाव टिंबर डेपो येथे पावतीने जमा करण्यात आला.
या प्रकरणी वनपाल भरतसिंग परदेशी यांनी भारतीय वन अधिनियम १९२७ च्या कलम २६(१) ड, ई, फ अन्वये वनगुन्हा क्रमांक ०१/२०२६ दाखल केला असून पुढील तपास स्वतः करत आहेत.
ही कारवाई धुळे वनवृत्त चे वनसंरक्षक निनु सोमराज, नंदुरबार वनविभाग चे उपवनसंरक्षक संतोष सस्ते, दक्षता विभागाचे विभागीय वनाधिकारी राजेंद्र सदगीर तसेच सहाय्यक वनसंरक्षक एस. डी. साळुंके यांच्या मार्गदर्शनाखाली पार पडली.
या मोहिमेत वनक्षेत्रपाल लक्ष्मीकांत शेंडगे (बिलगाव), वनक्षेत्रपाल चारुशीला काटे (अक्राणी), प्रशिक्षणार्थी वनक्षेत्रपाल प्रथमेश ढाणे, वनपाल भरतसिंग परदेशी, प्रतिभा बोरसे, वनरक्षक मंगेश वळवी, अशोक पावरा, उमेश पावरा, पुनम पावरा, रेखा पावरा, मनिषा पावरा, जोली वळवी, प्रमिला पावरा, गिरधर पावरा, दिनेश वसावे, वैशाली पाडवी तसेच वनमजूर जाण्या पावरा यांनी मोलाची भूमिका बजावली.
वनविभागाच्या या धाडसी आणि समन्वयपूर्ण कारवाईमुळे जंगल संपत्तीची होणारी तस्करी रोखण्यात यश आले असून, अवैध वृक्षतोडीविरोधात विभागाची सतर्कता पुन्हा अधोरेखित झाली आहे.
