🌸 श्री मौनी विद्यापीठ संचलित कुमार भवन शेणगाव येथे दहावीच्या विद्यार्थ्यांचा सदिच्छा समारंभ उत्साहात 🌸

शेणगाव : श्री मौनी विद्यापीठ संचलित कुमार भवन शेणगाव येथे शैक्षणिक वर्ष 2025-26 मध्ये इयत्ता दहावीच्या परीक्षेला सामोरे जाणाऱ्या विद्यार्थ्यांसाठी सदिच्छा समारंभ उत्साहपूर्ण वातावरणात पार पडला. कार्यक्रमाची सुरुवात मान्यवरांच्या हस्ते प्रतिमा पूजनाने करण्यात आली.
कार्यक्रमाचे प्रमुख पाहुणे म्हणून जि.प. कोल्हापूर (माध्यमिक विभाग) चे विस्तार अधिकारी श्री. डी. ए. पाटील सर उपस्थित होते. आपल्या मार्गदर्शनपर भाषणात त्यांनी दहावीचा टप्पा हा विद्यार्थ्यांच्या आयुष्यातील अत्यंत महत्त्वाचा टप्पा असल्याचे सांगितले. यश संपादनासाठी आत्मविश्वास, नियोजनबद्ध अभ्यास आणि प्रामाणिक परिश्रम आवश्यक असल्याचे त्यांनी अधोरेखित केले. तसेच कॉपीमुक्त अभियानात सक्रिय सहभाग नोंदवून प्रामाणिकपणे परीक्षा देण्याचे आवाहन विद्यार्थ्यांना केले.
यावेळी दहावीतील हर्षद कोरगावकर, अरुंधती जाधव, संस्कृती कदम, ज्योती गुरव आणि निकिता कुंभार यांनी आपल्या शालेय आठवणींना उजाळा देत कृतज्ञतेची भावना व्यक्त केली. विद्यार्थ्यांच्या मनोगतातून शाळेप्रती असलेले प्रेम आणि शिक्षकांविषयीचा आदर स्पष्टपणे जाणवत होता.
वर्गशिक्षक शरद पाटील यांच्यासह श्री. एस. एम. चोपडे, सौ. व्ही. ए. देसाई, श्री. के. एस. गावडे, सौ. ए. जी. कोतमिरे, श्री. एस. बी. बाजारी आणि श्री. पी. एम. मेंगाणे या सर्व शिक्षकांनी विद्यार्थ्यांना आगामी परीक्षेसाठी शुभेच्छा देत आत्मविश्वासाने परीक्षेला सामोरे जाण्याचे मार्गदर्शन केले.
कार्यक्रमाच्या अध्यक्षस्थानावरून मुख्याध्यापक श्री. अनिल कामत यांनी विद्यार्थ्यांना प्रेरणादायी संदेश दिला. “कष्टाशिवाय कोणतेही यश मिळत नाही. सातत्यपूर्ण अभ्यास, शिस्त आणि जिद्द यांच्या जोरावर उज्ज्वल यश संपादन करा व शाळेचा, गावाचा तसेच आई-वडिलांचा नावलौकिक वाढवा,” असे त्यांनी सांगितले.

कार्यक्रमाचे सूत्रसंचालन ज्योती गुरव, सिया कांबळे आणि धनश्री गिरीगोसावी यांनी प्रभावीपणे केले. प्रास्ताविक कुमारी गायत्री पाटील यांनी तर आभार प्रदर्शन संस्कृती माने हिने केले. उत्साहपूर्ण वातावरणात कार्यक्रमाची सांगता झाली.
या सदिच्छा समारंभामुळे विद्यार्थ्यांना परीक्षेसाठी नवचैतन्य आणि सकारात्मक ऊर्जा मिळाल्याची भावना व्यक्त होत होती.