पालघरः पालघरमध्ये पिकअप टेम्पोच्या धडकेत दोन महिलांचा मृत्यू झाल्याची घटना घडली. दुपारच्या सुमारास ही घटना घडल्याची माहिती आहे. शुक्रवारची सुट्टी असल्याने दोन्ही महिला पालघरचा बाजार करून नंडोरे येथे आपल्या घरी पररत असताना त्यांना पिकअपने मागून जोरदार धडक दिली. त्यात लता निलेश तरे (45) (रा. पिल्हेर पाडा नंडोरे) आणि बेबी चंद्रकांत जाधव (65) (रा. नवापाडा नंडोरे) यांचा जागीच मृत्यू झाला.
नंडोरेकडून नवापाडा परिसरात जात असताना हा अपघात घडला. पीकअपमध्ये दोन जण होते असे समजते. एक चोवीस वर्षीय शिकावू चालक पिकअप चालवत होता. लता आणि बेबी या रस्त्याच्या कडेने उजव्या बाजूने चालत होत्या. त्याच दरम्यान शिकाऊ चालक याचे नियंत्रण सुटल्याने भरधाव पिकअप डाव्या बाजूने उजव्या बाजूकडे येऊन दोघा महिलांना मागून धडक दिली.पुढील तपास पालघर पोलिस मार्फत सुरू करण्यात आला आहे.
