वाळूज एमआयडीसी | छत्रपती संभाजीनगर (प्रतिनिधी):
वाळूज एमआयडीसी परिसरातील तिसगाव चौफुली भागात २१ वर्षीय तरुणीच्या हत्येची धक्कादायक घटना उघडकीस आली आहे. या घटनेमुळे परिसरात खळबळ उडाली आहे.
मिळालेल्या माहितीनुसार, नंदिनी राजू धिवरे (वय २१) हिचा मृतदेह घरातील गादीत गुंडाळलेल्या अवस्थेत आढळून आला. सुरुवातीला आत्महत्येचा संशय व्यक्त करण्यात आला होता; मात्र पोलिसांच्या प्राथमिक तपासात हा प्रकार हत्या असल्याचे समोर आले आहे.
तपासादरम्यान कौटुंबिक वादातून ही घटना घडल्याची माहिती पुढे आली आहे. संबंधित तरुणी काही महिन्यांपूर्वी विवाह करून माहेरी परतली होती. त्यानंतर घरातील वाद वाढल्याची माहिती समोर येत आहे.
या प्रकरणी पोलिसांनी आई भारती उमेश साबळे आणि सावत्र वडील उमेश गोविंद साबळे यांना ताब्यात घेतले असून खुनाचा गुन्हा दाखल करण्यात आला आहे. पुढील तपास सुरू असल्याची माहिती पोलिसांनी दिली.
या घटनेमुळे कौटुंबिक वाद आणि त्यातून उद्भवणाऱ्या टोकाच्या निर्णयांबाबत समाजात गंभीर चर्चा सुरू झाली आहे. पोलिस प्रशासनाने नागरिकांना अफवांवर विश्वास न ठेवण्याचे आवाहन केले आहे.
